Vawiin khan Chief Minister Pu Lal Thanhawla chu Assam Rifles hotulu ber Director General Lt. Gen. Shokin Chauhan leh a nupui Pi Daphne Chauhan, President Assam Rifle Wives Welfare Association (ARWWA) ten a chenna inah an hmu a, DG, Assam Rifles hian venhimna leh ramri chungchangte leh thil dang pawimawh tak tak Chief Minister a sawipui a ni. 

Chief Minister Pu Lal Thanhawla chuan Assam Rifles chu Mizoram leh Mizo mipuite ah an mikhual loh thu sawiin kan inlaichinna hi a tha chho zel a ni, a ti a. Kawng hrang hrangah tunhma atangin Assam Rifles in mipuite a tanpui thin avangin mipui rilru ah pawh Assam Rifles hian hmun pawimawh tak a la luah reng nia a hriat thu a sawi a. Ramri venhimna hna chu Assam Rifles aia thawk tha tur an awm lovang tiin Myanmar ramri venhimna hna BSF thawh tir rawtna tun hmaa lo awm chu tha a tih loh thu a sawi tawh thu Lt. Gen. Shokin Chauhan a hrilh a ni. 

Lt. Gen. Shokin Chauhan chuan he inlaichinna hi tih ngheh a nih theih nan Military Civic Action programme kaltlangin hmun kilkhawra awm te mamawh zualte phuhru turin ruahmanna an siam thin thu sawiin tunhnaiah pawh hetiang ruahmanna kaltlangin Parva II ah solar light an dah thu a sawi. Ramri hrula venhimna chu a that tawk thu sawiin Assam Rifles hotulu chuan Myanmar nena thawhhona leh inlaichinna tha zawk a awm theih nan ramri hrula lui dungah Indo-Myanmar expedition huaihawt an tum tih Chief Minister a hrilh a. Mizorama Football lar mek chawikanna atana Under 19 (Mipa leh Hmeichhia) Football Tournament huaihawt an tum thu pawh a sawi a, hei bakah hian Mizoram paltlanga Myanmar leh Bangladesh kaltlang turin Bike rally pawh buatsaih a duh thu Chief Minister a hrilh bawk a ni. 

Director General hi Inspector General Assam Rifles (East) Maj. Gen. Bhupinder Dwivedi leh Commander, HQ 23 Sector Brig. M.S. Mokha ten an tawiawm a ni.

Attachment

  • Loading attachment...