Vawiin chawhma khan School Education Minister, Pu H. Rohluna chuan State Council of Educational Research and Training (SCERT) huaihawt ni hnih awh tur ‘Sensitization programme on new textbooks for Middle Schools’ SCERT Auditorium-ah a hmanpui.
Pu H. Rohluna chuan zirlaibu thar te hi zirna bakah hnam ziarang leh nunphung pholang thei tura duan an nih thu leh thangthar te kaihruaitu an nih ngei a beiseiawm thu a sawi a. Mizoram-a literacy sang ringawt hi duh tawk lovin zirlaite’n thiamna thuk zawk kan neih nan tan lak a tul a ni, a ti a. Zirtirtu te chuan zirlai te chungah nghawng nasa tak an neih thu sawiin thahnemngai taka thawk turin Minister chuan a fuih a. School education-ah kalphung a tha zawnga ti danglam tura hmalak zel anih thu tarlangin zirna piah lamah nundan tha inzirtir turin kalkhawm te chu Pu. H. Rohluna chuan a chah bawk a ni.
Sensitization programme-ah hian textbook thar leh NCERT syllabus zir chianna neih tum a ni a. Heng textbook thar te hian zirna leh zirtirna tidanglam nasa in a taka tih ngeia zir te, subject zawng zawnga tawng zirna ngaih pawimawh te, mahni chenna ram chanchin zir leh bye-heart system tihtawp te a kengtel a. Kum 2015-2016 academic session atang khan Mizoram School zawng zawngah NCERT textbook hman tan niin Mizoram mila tih danglam a ni a. Mizo medium leh English medium school zawng zawng te zir tura ruahman a ni.
He hun hi SCERT Director, Pi. Laldawngliani Chawngthu chuan kaihruaiin SCERT Joint Director, Pi. Zothanmawii chuan programme sawi zauna a nei a. Aizawl District chhunga Middle School Headmaster te an tel a ni.
