Nimin April ni 3, 2017 khan Mizoram Governor chuan North Eastern Council Office, Nongrim Hills, Shillong chu tlawhin amah hmuaktu NEC Secretary  Pu Ram Muivah, IAS leh NEC officials dangte nen NEC hnuaia ruahmanna kalpui mek hrang hrang chungchang an sawiho.

Nimina meeting-ah hian NEC Secretary leh officials dangte chuan hmarchhak state 8-a an hmalakna kalpui mek leh hlawhtlinpui tawh dan te Mizoram Governor Lt Gen Nirbhay Sharma, PVSM, UYSM, AVSM, VSM, (Retd) hnenah chipchiar takin an hrilhfiah a. Mizoram Larsap chuan NEC leh DoNER hnathawh dan chu a hrang hlaka kalpui a finthlak zawka a rin thu a hrilh a, tuna NEC leh DoNER hmalaknaah hian ruahmanna inang deuh deuh a tam a, kalpui dan tur leh hna vil chungchangah a hma aiin an uluk a tul thu a hrilh bawk. Tribal area, a bik takin Autonomous District Council area te chu NEC chuan a ngaihthah a thiang lova, hriselna, themthiamna, faina leh zirna lamte chu ngaih pawimawh hmaska nei turin a chah bawk. Hmarchhak state te chu ram dangte nena ramri intawm an ni deuh vek avangin NEC chuan an hmalakna hrang hrangah Ministry of External Affairs rawn zel a, an thawhpui thiam a ngai, a ti bawk.

NEC Officials te chuan hmarchhak state 8 hnenah tanpuina sum emaw scheme an kalpui hian thliarna an nei lova, an mamawh dan a zirin pek an ni fo zawk tih Larsap an hrilh a. Autonomous District Council area te pawh NEC hnuaiah direct-a tanpui an nih theih nan NEC Act pawh tihdanglam tum mek a nih thu an hrilh bawk.

Dy. RC, Mizoram House, Shillong Pu Jacob Lalawmpuia chuan Mizoram atanga damlo tam takin an pan thin NEIGRIHMS bulah Mizoram House thar sak a tul thu leh tuna Cleve Colony-a Mizoram House building chu sakthat a ngaih thu meeting-a a thlen chu NEC hotuten an bawhzui tur thuin an chhang a ni.