Vawiin khan Raj Bhavanah Mizoram Governor Prof. Jagdish Mukhi chuan Urban Development and Poverty Alleviation Department (UD&PA) hotute leh officer-te kawmna hun a nei.

Governor Prof. Jagdish Mukhi chuan khawpui hmasawnna tura UD&PA hnathawh hrang hrang a thlirpui a. Khawpuia bawlhhlawh leh hnawmhnawk buaipui dan tur changtlung zawk ngaihtuah a ngai a ni tiin  India ramah chuan Goa leh Indore ten hetiang lamah hian hma an sawn nasa a, an tihdan zirchian a pawimawh a ni, a ti a. Faina kawnga sawrkar laipui hmalakna lian tak Swachh Bharat Mission hnuaia UD&PA hnathawh leh hmachhawpte zingah toilet (ek in) sak kalpui dan ngai pawimawhin felfai leh tha taka thawk turin a fuih a. Heng bakah hian Atal Mission for Rejuvenation and Urban Transformation (AMRUT), Smart City, Swachh Survekshan, Pradhan Mantri Awas Yojana- Housing for All (PMAY-HFA) kalpui dan te sawiho a ni.

UD&PA hian kum 2015 atang khan Swachh Bharat Mission an kalpui a, Mizoram chhunga khawpui 23 te chu Open Defecation Free (ODF) a puan an ni tawh a. Individual Household Toilet 13942 sak tur zingah 2972 sak tawh a ni a, community toilet 1320 sak turah 91 zawh fel tawh a ni. Swachh Survekshan hnuaiah hian state hrang hrang faina kawnga inelnaah kumin khan Champhai, Lunglei leh Vairengte a titha zingah an lang pha a. AMRUT kalpuinaah Mizoram chu titha pawl tak niin top 5 zingah a lang pha ziah a ni.

Meeting-ah hian UD&PA Secretary Dr.C.Vanlalramsanga, Jt. Director Pu HVL Zarzoenga leh officer dangte an tel a ni.