Mizoram Governor Professor Jagdish Mukhi chuan lehlangin Champhai leh Myanmar ramri a tlawh a,  sorkar laipui flagship programme  Swachh Bharat Mission, Rural Electrification Programme leh Pradhan Mantri Ujjwala Yojna (PMUY) hamthatna dawngtu chhungkuate a tlawh kual bakah Indo-Myanmar Border Trade Point a ramri a enfiah a, ramri venghimtu Assam Rifles te hmalak dan tlangpui a hmunah a en a ni.  Vawiin chawhnu khan Champhai Circuit House-ah Champhai a sorkar Department hrang hrang hotute hma-ah thu a sawi bawk.
 
Governor Professor Jagdish Mukhi hi vawiin chawhma lam khan Champhai Helipad-ah sorkar hotuten lo dawngsawngin,  ram pahnih insumdawn tawnna hmuna ramri lei a tlawh bakah ramri venhim hna thawktu 10 Assam Rifles Major Sunil Patel chuan Zokhawthar a AR Sipai hmunah an hmalak dan tlangpui hrilhhriatna hun a hmang a. Governor Professor Jagdish Mukhi chuan sipaite thahnem ngaihna avangin ramri a mipuite thlamuang takin an awm theih phah a ni, a ti a. Tunlai khawvel media chak takah hian engkim chawpchilh a hriat nghal zel theih a nih avang hian Sipaiten dan ang taka chet la thin turin a fuih. Governor Professor Jagdish Mukhi chuan sorkar laipui Flagship programme te thingtlang kilkhawr berah pawh tih hlawntlin a ni chu lawmawm a tih thu sawiin,  a mit ngei a RGGVY,  Swachh Bharat Mission leh PMUY  hamthatna dawngtu chhungkua a hmuh chu lawmawm a ti hle.
 
Vawiin chawhnu khan Champhai Circuit House ah Sorkar Department hotute hma a thu sawiin,  Governor Professor Jagdish Mukhi chuan inbiak pawhna leh inkalpawhna piah lamah ramri dep hmuna chengte kawng hrang hrang ah an la hnufual hle tih sawiin  nasa taka tan lak a tul a ni, a ti. Indo-Myanmar Border Trade Point chungchang tarlangin Governor chuan zalen taka insumdawn tawn leh intlawh pawh tawn theih a nih rualin,  dan in a phal loh (illegal goods) hmanga sumdawnna kalpui a thiang lova;  engkim dan ang taka kalpui a tul thu leh India danpuiin khua leh tui nihna neih kawp a phallo angin helai hmunah pawh hian Dual Citizenship neih theih a nih loh thu a sawi.
 
Prime Minister Narendra Modi  kaihhruai sorkar chu Hmarchhak mite tan malsawmna a nih thu sawiin,  hmasawnna kawng tinrengin mipuite a tuam mek a.      Hmar chhak state-ah Rail kawng thar 15 tlan tir a nih thu te. Guwahati Airport chu India ram Airport lun ber 7-na ni mekin,  ram dang tlawh tur thlawhna thlawhchhuah tir mek a nih thu leh International Airport pawimawh tak ni tur chei bawl mek a nih thu Governor Professor Jagdish Mukhi chuan a sawi a.  Kum 2022 hian sorkar laipui chuan Loneitute buhbal thar chhuah chu a let a tihpun a nih ngei theih nan Agriculture & allied Sector-ah nasa taka tan lak a nih tur thu a sawi bawk. 

Circuit House a programme buatsaih hi Champhai DC Dr. Arveen Aggarwal chuan kaihruaiin Champhai SP Lalthiamsanga Sailo chuan lawmthu sawina hun a hmang bawk.