Mizoram rawn tlawh mek Union Minister of State for Roads, Transport & Highways Pu Mansukh Mandaviya chuan nimin tlai khan Mizoram Governor Mizoram Governor Lt Gen Nirbhay Sharma, PVSM, UYSM, AVSM, VSM, (Retd) chu a chenna Raj Bhawan-ah hmuin Mizoram tana hmalakna tur an sawiho a, Larsapin zanriah a buatsaih sak chu an kil bawk.

Mizoram Governor chuan Mizoram a rawn tlawh avangin Minister chu lawmthu a hrilh a, hmarchhak bial chu nakin lawka sumdawnna hmun pawimawh a nih dawn avangin kawngpui tha nei a pawimawh thu a sawi a. Mizoram chu ramhmul damdawi lamah a hausak thu Minister chu hrilhin ramchhung mai ni lo, khawvel puma hralhchhuah a nih theih nan ramhmul damdawi sangbawlna hmun lian ‘herbal industry’ changtlung tak Mizoram-ah bun a fuh a rin thu a hrilh bawk. Chu bakah chuan Mizoram chu thing leh mau-a a hausakna hi sorkar tanpuina nen sumdawnna liantham taka siam thei a rin thu hrilhin Mizoram chu sumdawnna kawnga thawm a nei thei tak tak tur chuan inkalpawhna - kawngpui, lui kawng leh thlawhna - hmanga ramchhung leh pawn nena a inzawm that a ngai a ni, a ti bawk. Mizoram boruak, sik leh sa leh state ralmuang a nihna avang pawhin Medical Toorism emaw Health Tourism emaw lamah pawh cheibawl tlak a ni, a ti.

Union Minister of State for Roads, Transport & Highways Pu Mansukh Mandaviya chuan Mizoram a vawi khat tlawhna a nih thu leh a ram leilung, sik leh sa chu duhthusama mawi leh nuam a nih thu a sawi a. Governor rawtnate chu tha a tih thu sawiin Mizoramah damdawi tlawm zawka leina hmun ‘Jan Aushadhi Centre’ pahnig chauh awm chu dah belh a, Mizoram hmun laili deuhah te Centre 25 hawng turin hmalak a ni ang, a ti. Hmarchhak bial state zawng zawngte chu thlai leh theiah an hausa a, khawvelin damdawi tel miah lo thlai leh thei ‘organic food’ a ngaisang em em a chuvangin hei pawh hi hmarchhakah sorkar hmalakna tur kawng thar a ni thuai ang a ti bawk. Mizoram chhunga kawngpui siamna leh thawmthat hna thawh atan sorkar laipui chuan cheng vaibelchhe 600- a bituk thu Larsap a hrilh bawk.