Zankhat riaka Mizoram lo zin Sawrkar Laipui Ministry of Roads, Transport & Highways, Shipping leh Chemicals & Fertilizers enkawltu Minister of State Pu Mansukh  Mandaviya chuan nimin tlai khan Chief Minister Pu Lal Thanhawla chu a chenna in CM Bangla ah hmuin a Ministry enkawl ten Mizorama hma an lak tum dan leh hemi atan ruahhmanna an neih te a hrilh.

Minister of State Pu Mansukh Mandaviya chuan inkalpawhna tha chu Central Sawrkar ngaihpawimawh berte a nih thu sawiin Mizoram kaltlanga Hmarchhak leh ram chhung hmun dang te, Myanmar leh thenawm ram te nena inthlunzawmnaah Mizoram chuan dinhmun pawimawh tak a luah a, Mizoram hmabak hi a eng a ni, a ti a. Chief Minister in ramchhung hmun dangte angin tlang ramah hmasawnna ruhrel siam a hautak leh hmun dangte nena a man chungchang khaikhin chi a ni loh thu a sawilan chu Pu Mandaviya chuan pawmin India ah hian ram leilung (geography) inang lo tak tak a awm tih hi kan pawm tlan a ngai a, chu chu ngaihtuahin ruahmanna te hi siam a ngaih thu a sawi. Prime Minister in Minister ten Hmarchhak state te an tlawh tur a ni a tih hi thil tha tak ni a a hriat thusawiin a hmuna thil awm dan te chiang zawkin kan hre thei a, hmalak dan tur ruahman a awl a, he hi Prime Minister in Hmarchhak hmasawnna atana a hmathlir nen pawh thil inmil tak leh tangkai tak a nih thu a sawi bawk a ni.

Kaladan Multi Modal Transport Transit Project leh tuna ruahmanna thar NH-54 Aizawl to Tuipang tih zauh chungchang te pawh an sawi dun a, heng kawng pawimawh dan ngaihtuahin a hma thei ang bera Multi Modal Project zawh a nih theih nan leh NH-54 tih zauh hna tan a nih theih nan harsatna awm te, a bik takin ram lak leh compensation chungchangte hi chinfel vat a that thu te an sawi dun bawk a ni.

PWD hotute he inkawmnaa tel chuan Ministry of Roads, Transport & Highways Regional Office Guwahati-in Arunachal Pradesh tih loh Hmarchhak state dang zawng zawng a enkawl avangin work load sang tih ziaawm nan thawktu dah belh turin Minister an ngen a, hetia thawktu an indaih chuan Highways hnathawh chak zawka kalpui theih an beisei tih an sawi.

Central Minister chuan a Ministry enkawl dang hnuaia mirethei ten man tlawm zawka damdawi tha an lei theihna  Pradhan Mantri Jan Aushadi Pariyojana dawr chu tuna Mizoram a 2 awmsa bakah RD Block tinah hetiang dawr 1 tal hawn belh an duh tih sawiin, hei hi sawrkar nilo pawl emaw, mimal emaw te pawh in an hawng thei a, a Scheme hnuaiah hian a hawnna turin cheng nuai 2 leh a chanve thleng tanpuina pek theih a nih thu a sawi a. Chief Minister chu hei hi a thawkhatna atan District zawng zawngah 1 tal hawn a nih theih nan hma lak a tum thu Minister a hrilh a ni.

Chief Minister nena an inkawm hnu hian Central Minister Pu Mansukh Mandaviya chuan CM Conference Room ah chanchinbu mite kawmna hun neiin Press Conference a nei zui nghal a. Press Conference ah hian Hmarchhak tan Prime Minister hmathlir te sawiin Lamlian NH-54 Aizawl to Tuipang, kilometre 372, tihzauh a, 2-Lane a siam nan Ministry chuan remtihna a pek tawh thu a puang a. National Highways & Infrastructure Development-in kumin November thla a he hna hi tan an beisei tih a sawi. He kawng hian KMTTP kawng a zawm dawn tih sawiin Mizoram hmel leh dinhmun a thlak danglam thei dawn a ni, a ti bawk. He Project hi Japan International Cooperation Agency (JICA) sum hmanga “North East Road Network Connectivity Project Phase I” hnuaia  siamtur niin a project man hi cheng vaibelchhe 6168 a ni.