ICFAI University Mizoram kum 10 tlin lawmna chu vawiin khan Aijal Club-ah neih a ni a, he hunah hian Mizoram Governor Lt Gen Nirbhay Sharma, PVSM, UYSM, AVSM, VSM, (Retd) chu Khuallian niin USA Ambassador to India Pu Richard R Verma chuan Keynote Address a sawi bawk a ni.

ICFAI University Mizoram Registrar Dr.Samuel Lalnunzira Dingliana kaihhruai inkhawmah Mizoram Governor chuan thu sawiin India leh USA inkara inlaichinna tha tak awm chho mek theihna chhan chu India mi tam tak USA-ah hnathawka awm, nihna pawimawh leh ram hmasawnna atana thawhhlawk engemawzat an awm vang a ni, a ti a. Chung zingah chuan vawiina USA Ambassador lo zin mek pawh a tel thu tarlangin Larsap chuan Ambassador Verma India-ah kum 2 palai hna a thawh chhungin ram pahnihte thawhhona chu nasa takin a thang a, ruahmanna thar tam tak an siam dun thei bawk a ni, a ti bawk. India leh USA chuan khawvel thang zelah Asia-Pacific bial hi a pawimawh a ni tih hriain helai bial hmasawnna tur leh he biala cheng mipuite changkanna turin hmalakna tam tak an nei mek chu a lawmawm hle a. India Prime Minister Pu Narendra Modi pawhin hmarchhak bial pawimawhna hriain ‘Act East Policy’ chu chak takin a kalpui mek a, sorkar laipui hmalaknaah Mizoram chuan hmun pawimawh ber a luah hial thei a ni tih a sawi. Hun reiloteah hmarchhak bial, a bik takin Mizoram chu India leh South East Asia ram dangte nena insumdawn tawnna kawngah kawngkapui ber a nih dawn avangin Mizo mipuite pawh chumi hun atan hmathlir chiang tak nei a, mahni insiamthat leh inchher chhoh zel a hun takzet bawk a ni, a ti. India hmarchhak bial bakah thenawm ram Nepal, Bhutan, Bangladesh, Myanmar, Tibet leh Yunan of China ah hian khawvel mihring zaa 25% an cheng a, leilung hausakna tam tak nei mahse khawvel hmundangte aiin an la hnufual a, chuvangin heng hmunte hi USA pawhin ngai pawimawh a, hmasawnna chak zawka kalpui theih nan tanpui tura a duh thu a sawi a; hemi piah lamah heng hmuna cheng mipuite chu hmasawnna um pha zel tura an inpeih loh chuan khawvel changkang chak tak hian a kalsan thui lutuk palh ang tih a hlauh thu a sawi bawk.

Keynote Address sawitu USA Ambassador to India Pu Richard R Verma chuan India-ah kum 2 palai hna a thawh chhung hi India leh USA inkarah thawhhona leh inpawhna hun tha ber nia a hriat thu a sawi a. Ambassador a nih chhungin US President leh India Prime Minister te vawi 9 an inkawm a, Summit 2-ah an tel dun bawk a, Indo-US hmalakna thar hlak chi 100 an tan thei bawk a, kan ram 2 sorkar aiawhte telna working group 40 lai an din hman bawk tih a tarlang a. Khawvela democracy lian ber 2 - USA leh India - te chu thawhhona tha nei awm reng an nih thu sawiin Clean Energy leh Climate Change chungchanga khawvel ram tam zawkten thawhhona thuthlung ‘Paris Climate Agreement’ an ziah theihna chhan pawh India leh USA ten heng thil pahnih an ngaih pawimawh leh an tuipui vang a ni, a ti bawk. USA chu India insumdawnpui ram (trade partner) lian ber a nih tawh a, heng insumdawnna tawnna atangin India chuan 30 billion dollars lai hlawkna a tel mek a ni, a ti a. Tun hma zawng aiin US Visa hmuh a awlsam phah mai bakah 1.2 million American tourists te chu India ram an tlawh a ni tih a sawi a. India atangin zirlai a hma zawng aiin USA-ah zirna in hrang hrangah an awm mek bakah Seattle, Washington-ah Indian Consulate thar siam tum a ni bawk, a ti. Defence lam mamawh, ralthuam, thlawhna leh thildang tam tak siamna lamah USA chuan India a thawhpui dawn mai piah lamah heng siamna hmun chu India ramchhungah bun a ni dawn a; Civil Nuclear Project lian tham tak India nen an nei mek thu a tarlang bawk. USA leh India mipuite belhkhawm chu mihring 1.6 billion a tling a, heng ram ropui tak 2 te an chak a, an sum leh pai dinhmunte a that chuan khawvel pum hmasawnna leh thanzelna turah a tha zawngin nghawng an nei thei a ni, a ti.

USA Ambassador to India Pu Richard R Verma hi US Consul General Craig Hall, Consul for Political & Economic Affairs Prasenjit Gupta, Asst Public Affairs Officer Greg Pardo, Media Specialist Deepa Datta leh Political Specialist Tinku Roy ten an rawn tawiawm a ni.