Zan khat riaka Mizoram rawn zin USA Ambassador to India Pu Richard R Verma chuan nimin tlai khan Mizoram Governor Lt Gen Nirbhay Sharma, PVSM, UYSM, AVSM, VSM, (Retd) chu a chenna Raj Bhawan-ah tlawhin Mizoram hmasawn zelnaah USA-in a tanpui theih dan tur kawng hrang hrang an sawidun.

USA palai Pu Richard Verma chuan Mizoram chu state ralmuang ber leh peace accord hlawhtlinna ber state a nih avangin a ngaihsan thu Mizoram Larsap a hrilh a, ramchhung state 28 lai a tlawh tawh thu leh Mizoram a rawn tlawh vawi khatna a nih thu a sawi bawk.

Mizoram Governor Pu Nirbhay Sharma chuan Mizoram Peace Accord hlawhtlinna chhan chu a ram mipuite tanrualna vang a ni tih sawiin Mizo khawtlang inenkawl dan te, kohhran leh tlawmngai pawlte hnathawh dan a fak a. Hmarchhak bialah ruihlo leh ralthuam tawlhrukna chu buaipuiawm deuh mahse Mizo mipuite chu dan leh thupek zahthiam leh zawm tha an nih avangin Mizoram chu state ralmuang ber a ni hial thei ta a ni, a ti. India leh thenawm ram Myanmar leh Bangladesh te chu hmasawnna kawng hrang hrangah thawhhona tha an nei chho zel avangin nakin lawkah chuan Mizoram hi sumdawnna hmun pawimawh leh Southeast Asia kawngkapui ber a nih a beisei thu a sawi bawk a. USA chuan a bik takin zirna leh hriselna, skill development leh ruihlo dona kawngah Mizoramah hma la se a duh thu a hrilh bawk.