Vawiin chawhma dar 11:00 khan Mizoram Governor Pu Vakkom Purushothaman chuan Champhai a thleng a, a lawmna leh hmuahna Champhai Circuit House tualah neih a ni.

Larsap Pu Vakkom Purushothaman chu thu sawiin, Champhai DC, SP, NGO, Official leh amah hmuak tura kalkhawm te chibai bukin, tun aia hmaa Champhai-ah a kal thei lo chu mipui hriatthiamna dilin, tunah hian Mizoram District dang zawng zawng chu a tlawh chhuak vek tawh a, Champhai chu a tlawh hnuhnun ber a ni, a ti a. Champhai khua chu Mizoram mai nilovin India ram tan khaw pawimawh tak  anih thu sawiin, tuna an mamawh ber pakhat National Highway chungchang pawh sorkar official te sawipui a tum thu a sawi a ni. Mizoram hi Pathian nung awmna ram a ni a, chuvang chuan Pathian malsawmna pawh an thil tih na kawng tinrengah an dawng a ni a ti. A bikin tun Santosh Trophy-a Mizoram Team te India ram champion an ni chu a chuan thu a sawi a, Mizoram hi a awmna ram Kerela State tih lovah chuan Literacy-ah a sang ber an ni a, lehkhathiam an pung zel a, Sorkarin hna a pe seng bawk si lova, chuvang chuan tuna Mizoram tana pawimawh ber chu Industry lam ngaihtuah a nih thu sawiin, tun dinhmunah rih chuan Industry lian din ngaihna a la awm lova, a la tih theih awm chhun chu Handloom leh Handicraft bak a la ni rih lova. Chuvang chuan a bikin zirlaite chuan an zirna an zawh hnuah Kerela rama an tih angin India ram leh Khawvel hmundangah hna zawng tura inzarpharh a pawimawh a ni a ti.

India ram hi Khawvel Democracy ram lian ber niin, mirethei ber leh mihnuaihnung ber pawhin dinhmun sang ber a chelh theih thu Mizoram Larsap chuan sawiin, chung zingah chuan India ram President 10-na K.R. Narayanan pawh hnam hnuaihnung leh mirethei chhungkua atanga rawn chawrchhuak a ni a. Dinhmun pawimawh hrang hrang India President nihna thleng a chelh theih thu a sawi a, a bikin zirlai kalkhawmte chu thawhrimna nen thil an ti a nih chuan an duh apiang anni thei a ni a ti bawk. Tun tumah hian Champhai khaw harsatna engemawber chu official te nen an sawi anga, sutkian sak a tum thu a sawi bawk a ni.

Larsap hmuahna inkhawmah hian Pu Sangdingliana IAS, District Bawrhsap chuan lawman thu  sawiin, Champhai khua in thil ropui tak lo hlan tur neilo mahse, an nihna ang anga mipuiin an lo lawm thu sawiin, Champhai khua chu Indo-Myanmar Border a awm a ni a, a khua hi tlangram leh lui ten a hual vel leh sik leh sa boruak nuam tak a ni a, chuvang chuan Governor chu Chaphaia a cham chhunga nuam taka hun hmang turin duhsakna a hlan a ni.

Pu K. Lalmawia, Chairman, Champhai Joint VC pawhin Larsap lawman leh thusawina hun neiin, hetiang ang hun chep tak kara Governor in Champhai a tlawh chu a lawmawm bakah a thlamuanthlak a ni a ti a. Champhai khua hi India ram tan kulh pawimawh tak leh ral hmatawng a ni a, chutih rualin India ram hmel lanna pakhat a nih avangin, Sorkar hian National Highway leh Border Trade changtlung zawk siam tura a duh thu leh, Mizo hnam thil hlu tun thlenga Champhai khua in a la neih chu vawngim tura a duh thu leh, ramri a awm a nih avangin venhimna lamah tun aia famkim zawka Champhai chu thuam a ngaihthu te Larsap hnenah hian a thlen bawk a ni. Champhai khaw boruak chu Larsap pawhin nuam a tih ve ngei a beisei thu sawiin a kal zelna torah duhsakna leh damreina a hlan bawk a ni.

Vawiina Larsap lawmnaa Special Item neitu - Sub-Hqrs YMA Champhai, Sub-Hqrs MHIP Champhai te leh MZI Champhai Hqrs. te chu Larsap hian lawman thilpek tangkafai a hlan theuh a ni.

Governor Pu Vakkom Purushothaman hian Champhai-a zanhnih hun a hman chhungin NGO te, Department Head te leh chanchinbumite a kawm dawn bakah, Zokhawthar, Tlangsam Winery leh Hnuchham In te a tlawh dawn bawk a ni.