Kum hnih dan a neih thin Mizoram Govt. Nursing Service Association (MGNSA) General Conference vawi 18-na hawnna inkhawm chu vawiin khan Health & Family Welfare Minister Pu Lal Thanzara’n Aizawl Civil Hospital Conference Hall-ah a hmanpui.

Health Minister chuan ram leh hnam siam kawngah nurse te hian mawhphurhna lian tak an neih thu sawiin, ram leh hnam hmasawn tur chuan mipui an hrisel a pawimawh hmasa a, chutiang kawngah chuan nurse te hi an pawimawh ber a ni, a ti. Zoram chhunga nurse indaihlohnate chu sutkian sak a tum thu sawiin, hrehawm karah pawh nurse ten midang tana an inpekna leh an thawh rimna te chungah Minister chuan lawmthu a sawi bawk a, “heng inpekna hnathawh te hi a thlawn ngailo a ni,” a ti. Minister chuan Aizawl Civil Hospital-a Cardiology Ward pawh hman tura hawn thuai a nih tur thu a sawi bawk.

He huna Khualzahawm Dr. K. Ropari, Principal Director, H&FW chuan nurse-te chu an mizia leh lan dan atang rigawt pawhin damlote tan damna thlentu an ni thei a ni, a ti a. Damlote hnim hnai leh hrechiangtu ber an nih angin, damlote natna pawh zep sak thin turin nurse kalkhawmte chu a chah bawk.

Vawiin inkhawmah hian an member boral ta mi pahnih sunna hun an hmang a. An member pension a chhuak ta mi 29 hnenah ngaihhruihna thilpek hlan a ni bawk. Kum 10 chuang MGNSA a hruaitu nihna lo chelh tawh mi panga hnenah chawimawina thuziak (citation) leh lawmpuina pawisafai hlan a ni bawk a. Chawimawina hi MGNSA in an Patron atan an ruat thar Pi Zohmingthangi, Health Minister nupui chuan a hlan a ni.

Vawiin hunah hian MGNSA President Pi R. Lalsangpuii’n pawl hmalakna leh hmachhawpte sawina hun a hmang a. Pi Thanpari Pautu, Deputy Director Nursing hnen atangin an conference thupui “Improvement of Nursing Service in Mizoram” chungchang ngaihthlak a ni. He hun hi Dr. Rosangluaia, Medical Superintendent, Mizoram College of Nursing leh Apollo School of Nursing a Principal-te leh mi pawimawh dangten an hmanpui a ni. General Conference hian ni hnih a awh ang.