Ni 1.10. 2014 atanga Boys' Hockey Academy khelmuala khelh tan 4th Mizoram Grand Hockey Championship -2014 final chu vawiin chawhnu dar 1.00 khan final khelh a ni a. Hmar Veng Sporting Club, Kawnpui chuan Ist IR Bn. Mualvum chu 2-1 a hnehin an champion.

He championship kharnaa khuallian Sports Minister Pu Zodintluanga chuan, 'Hockey hi infiamna kawnga Mizo hranghluiten hming an chherna a ni thin a, thangtharte hunah pawh theihtawpa chawi lar leh hi kan tum mek a ni' a ti. Kawnpui-a Boys' Hockey Acedemy din a nih theihna tur leh astro-turf phah khelmual tha a awm theihna tura theihtawp chhuahtute chungah lawmthu a sawi rualin, 'Aizawl-ah pawh Mizoram Hockey Association ten hmun remchang in hmuh phawt chuan astro-turf phah field kan siam ang, a tihhlawhtlin dan tur chu sawrkar leh ka kutah dah ngam rawh u' a ti bawk. Mizoram sawrkarin hmun hrang hrangah infiamna tihphuisuina turin thil a tihlawhtling tawh a, hmachhawp tam tak zingah Kolasib khawpui chhungah  stadium puitling, a sira intlansiakna awm nghal sak a ni dawn a, UD&PA Ministry chuan 'Tender chhuah tawh rawh u' min rawn ti a ni Sports Minister chuan a ti.

MHA President leh Parliamentary Secretary Pu Hmingdailova Khiangte chuan he inkhawm hi a kaihruai a. 'Mizoram-a hockey tungding leh tura min phurpuitu Sports Minister kan nei hi a vanneihthlak a. Boys' Hockey Academy atanga zir chhuak tam tak te hi Mizoram tihmingtha turin duh mah ila Assam Regiment Centre leh state pawn lama hna nena sawmtu an tam avangin kan chelh bet zo lo thin a ni' a ti.

Champion team, Hmar Veng Sporting Club hian Rs 40000 leh trophy an dawng a, runners-up Ist IR Bn. Mualvum hian trophy leh Rs 20000 an dawng a ni. He championship hi Mizoram-a hockey tournament-a lawmman pawisa fai tam berna a ni.