He thu hi Social Welfare Minister Pu P. C. Lalthanliana’n vawiina Social Welfare Department hnuaia Mizoram State Child Protection Society (MSCPS) in District hrang hranga Child Welfare Committee-te tana ni thum awh Training, Aijal Club-a a buatsaih a, a hawnna programme a sawi a ni.

Pu P. C. Lalthanliana chuan naupangte hi kan ram nghahfak an ni a, anmahni venghim tur leh enkawl tur hian puitling te hian mawhphurhna lian tak kan nei a. He mawhphurhna hi nu leh pa tam takin an hlenchhuah thin loh avangin naupang tam tam tak te dikna leh an chanvo palzut leh rahbeh sak an ni fo thin. Chuvangin kan tu leh fate, kan ram leilunga naupangte venhim nan theitawp chhuahin kan hma zawn theuhah nasa lehzualin tan la thar theuh ang u, a ti.

Social Welfare Minister chuan naupang hlamchhiah, fahrah, pawngsual leh khuaikhem tawk te, ngaihthah te, a bika venhim ngai te leh natna benvawn veite hi an dikna chanvo an neih theih nan leh humhim an nih theihna tura thawktu pawimawh ber leh an tana rorelsak tute in ni a. He mawhphurhna hi dik tak leh rinawm taka inhlenchhuah theihna turin duhsakna ka hlan che u a ni, a ti.

A sawizelnaah Minister chuan Integrated Child Protection Scheme (ICPS) hian hetiang naupang te hamthatna turin kawng hrang hrangin theihtawpin hma a lak mek thu sawiin Children’s Home for Special Needs – pianphunga rulbanlo, rilru lama harsatna nei leh ruihhlo vanga buaite tan a bikin Home hrang theuh hun reilote chhungin kan nei dawn a ni, a ti. Pu P. C. Lalthanliana chuan Child Welfare Committee Member te hi ICPS hmalakna kawng peng pawimawh berte a nih thusawiin mawhphurhna pawh an ngah hle dawn a ni, a ti.

ICPS anga hnathawh a nih tan kum 2012-2013 khan Child Welfare Committee (CWC) ah hian naupang a bika enkawl leh venhim ngai case 784 lut in , chung zinga 379 chu mipa naupang an ni a, 405 chu hmeichhe naupang an ni ve thung. Kum 2013-2014 ah thung chuang CWC ah case 1359 lai lutin, heng zinga 699 chu mipa niin, 660 te hi hmeichhia an ni a. He hian naupang a bika enkawl leh venhim ngaite tanpuina kawnga mipuite kan thang harh nasatzia leh Child Welfare Committee te pawimawhna a tilang chiang hle a ni, a ti, Pu P. C. Lalthanliana chuan.

Mizoram State Child Protection Society bultuma Child Welfare Committee Member-te tan ni thum awh training “Orientation Training for Members of Child Welfare Committees in Mizoram” hawnna hi Pi Vanlaldini, Director Social Welfare Department in a kaihruai.

Training ah hian Mizoram District tina Child Welfare Committee Member mi 40 leh District Child Protection Officer 8 te an tel. He Training hi ni thum(3 days) awh tur niin, naupang dikna chanvo humhim kawnga Mizoram khaikhawmtu ber Integrated Child Protection Scheme (ICPS) chungchang, Naupang dikna chanvo, Naupang chunga hleihlenna, Dan hmanga fa lak chungchang (Adoption) leh Naupang pual bil dan chi hrang hrang (Juvenile Justice (Care and Protection of Children) Act 2000, Protection of Children from Sexual Offence Act. 2012; Child Labour Regulation of Prohibition Act 1986; Domestic Violence Act 2000) te zir ho a ni.

Heng a chunga thupui hmang te hian Mizoram State Child Protection Society a thawktute leh, dan lama mithiam Pi Sylvie Z.Ralte (Chief Judicial Magistrate, Aizawl District), Pi Julie Lalrinzami (Senior Civil Judge - cum - Judicial Magistrate 1st Class, Mamit District), Pu.T.Lalnunsiama( Advocate), Pi Lalfamkimi ( Advocate), leh Education lama mi thiam Pi, Vanlalchhuani Khithie ( Co-Ordinator, SSA, State) ten zirtirna an pe dawn a ni. Heng bakah hian Child Welfare Committee thuneihna leh chanvo, tihturte pawh zir ho a ni ang.

CWC hi Juvenile Justice ( Care and Protection of Children) Act 2000 hnuaia Sawrkar aiawh a naupang enkawl leh venhim ngaite chungchang ngaituahtu niin Integrated Child Protection scheme (ICPS) hnuaia peng pakhat pawimawh tak a ni. ICPS hi Central Scheme niin kum tling lo ten a pawi an khawih a a bika enkawl leh a chanvo humhimna dan, Juvenile Justice (Care and Protection of Children) Act 2000, tih hlawhtlinna atana he Scheme hi ram pumah kalpui mek a ni a. Mizoram-a ICPS hman anih theih nan MoU hi April ni 30, 2010 khan sign niin Nodal Department chu Social Welfare Department a ni. Naupang harsatna tawkte dikna chanvo humhim saka tha tak leh awmze nei taka an lo thanlen theihna atana hmun him leh boruak muanawm siamsak hi ICPS thiltum pawimawh tak a ni.

Mizoram hian Sawrkar enkawl Observation Home pathum; Sawrkar enkawl Special Home pahnih; Specialised Adoption Agency pali (4) ( Sawrkar enkawl 3 leh NGO enkawl 1); Children Home, NGO pawmpui tena an enkawl 27 leh Shelter Home, Sawrkar enkawl pariat te an awm mek a. District tinah Member panga awmna Child Welfare Committee, Member 3 awmna Juvenile Justice Board leh Special Juvenile Police Unit te an awm bawk a. Special Juvenile Police Unit te hi Mizoram Police Station awm zawng zawng 47 ah te hian a awm vek a ni.

Pianphunga rualbanlote Home tur hi Durtlang-ah butsaih mek a ni a, rilru lama harsatna nei tana Home hi SWD Office bul Laipuitlanga din turin hmalak mek niin ruihhlo vanga buaite tana Home chu a hmun tur dap mek a ni. Khaw tinah Village Level Child Protection Committee din anih theih nan Social Welfare Department hian hma an la mek bawk.