Tunhnaia Manipur MZP General Conference hmanpuia kal Health Minister Pu Lalrinliana Sailo chuan Regional Institute of Medical Sciences Hospital, Imphal a tlawh a. RIMS Director nen inkawmna hun neiin Mizoram-in MBBS seat quota 10 a neih thin, seat 7-a tihtlem tak chuh a ngai anga pe let leh turin a ngen a. PG zirna seat pawh 50% lai tihhniam tumna awm chu a ngai anga a kal leh ngei theih nan leh Mizoramin seat a la neih ngai lohnaa seat a neih belh theih dan tur a sawipui bawk.
Health Minister hian All Mizo Medical Students Union, Manipur Branch te nen inkawmna hun tha tak a neih pui bakah zirlaite chu hnam tana zir an nih tih inhre reng tur leh hlawhtlin tum ngei turin a fuih a. Heng zirlaite hian Minister hnenah lawmthu sawiin Mizoram Minister tlawhtu awmchhun leh hmasa ber a nih avangin leh ngaihsakna a rawn lan tir avangin Minister chungah lawmthu an sawi a, an mamawh hrang hrangte Minister hnenah an thlen chu ani pawhin a sutkianpui dan turte a sawipui a ni. AMMSU tanpui nan Minister hian Rs.3000 a hlan bawk a ni.
