Gujarat-a ruahmanna hlawhtling entawntlak a bik takin contract farming, cooperative movement leh entrepreneurship development te a hmuna en a an tih dan tha te zir tura kal Finance Minister kaihhruai Mizoram High Level Team chuan Gujarat hmun hrang hranga heng thil an kalpui dan te zirin an tlawhkual.

Gandhi Nagar District-a Shivpura Kampa khuaa Pepsico Company-in contract farming a kalpui dan tlawhin he khuaa loneitutu ten nen inkawmhona hun an nei a, contract farming-a a ngaihdan leh a hlawkdan te an zawt a. Chandralala khuaa ICT leh Balaji Company ten cold storage hmanga thlai an sawngbawl leh hralhchhuah dan an tlawh leh a, company aiawhte nen inkawmhona an nei a. Sabarkantha District-a Vadrad khuaa awm Centre for Excellence for Vegetables an tlawh leh a. Vegetable Nursery leh Trial Field te fangkualin helai hmuna thlai chungchanga hma an lakna te an en a ni.

Gujarat Sawrkar thuthmun Gandhinagara Secretariat Sachivalaya ah Gujarat Agriculture Minister Pu C.D. Shapariya leh High Level Team te hian meeting neiin Agriculture & Cooperation Principal Secretary in Presentation a pe a, Gujarat a contract farming leh cooperative movement kalpui dan an hrilh a. Mizoram High Level te hi nizan khan Gujarat Agriculture Minister hian zanriah a buatsaih sak a ni.

Nimin khan Gandhinagar District-a Isanpur Kota khuaa Primary Agriculture Credit Society tlawhin an hnathawh dan te an enin helaia loneitu ten heng cooperative ruahmanna an hman tangkai dan an zawt a. Hemi hnu hian Ahmedabad-a District Central Cooperative Bank an tlawh lehin hnathawkte nen inkawmna an nei a. Hemi hnu hian India leh khawvel huapa cooperative movement hlawhtling bera ngaih Anand-a Anand Milk Union Limited (AMUL) hmunpui an tlawh leh a, AMUL hotuten High Level Team hi lo dawngsawngin hna an thawh dan te an hrilh a, AMUL factory te an tlawhpui bawk a ni.

High Level Team ah hian Finance Minister Pu Lalsawta bakah State Planning Board Vice Chairman Pu H. Liansailova; Horticulture Minister Pu P.C. Lalthanliana; AH & Vety. Minister Pu Ngunlianchunga; Chairperson, Mizoram Cooperative Apex Bank Pi T. Lalmuanpuii te bakah Planning Secretary Dr. C. Vanlalramsanga leh senior officer dang engemaw zat an tel a ni.

High Level Team hi vawiinah Aizawl lo thleng  tura beisei an ni.