National Service Scheme (NSS) Regional Centre (North East) leh NSS (Cell) Mizoram, Sport & Youth Services Department, Govt. of Mizoram tangkawp in a buatsaih North East Youth NSS Festival 2016 Valedictory Programme Art & Culture Complex, Berawtlang a neih chu Dy. Speaker Pu R.Lalrinawma’n a hmanpui.

Khuallian chuan thu sawiin, NSS chu Hnampa Mahatma Gandhi a piancham vawi 100 lawmna puala kum 1969 a India rama University 37 leh zirlai 40,000 huap a din a nih thu a tarlang a. A tum ber khawtlang tana hnathawh pah a zirlaite nun siamthat a nih angin hna tamtak khaw din, kawng thuamthat, thingphun, zirtirna pek, , zenghri natna umbo leh hmeichhe hamthatna tana hnathawh te a tel thu a tarlang bawk.

Zirlai kalkhawm te chu fuihin, NSS Motto ‘Keimah nilovin, Nangmah’ (Not Me But you) in a tarlan angin ram leh khawtlang tan a mahni inpe zo taka thawk zel turin a chah a. Midang te thu leh hla ngaichang thiam a, mahni mihringpui te chunga ngilneihna leh hriathiamna lantir zel turin a fuih bawk a ni. Hnampa Mahatma Gandhi an min zirtir angin damchhung tawite a lawmman beisei lo leh mahni inpe zo (Selfless Service) taka khawtlang tana thawk zel turin kalkhawm te chu a fuih a, khawvel hmasawnna nen a inher rem (flexibility) zel turin NSS chu a duh thu a sawi bawk.

Inkhawm hi Pu P.S. Sanghluna, Additional Secretary, Sports & Youth Services, Govt. of Mizoram in a kaihruai a. Indira Gandhi National NSS Award 2015-16 Hmarchhak atanga Mi pahnih dawng awmchhun Dr.Zoramdinthara, Programme Officer leh Nula Chawnghlunchhungi, Volunteer, NSS, Pachhunga University College ve ve te hnenah Ngaihhruina thilpek hlan an ni a, Hmarchhak State 8 te aiawh theuh hnenah Certificate hlan an ni bawk. Festival ah hian hmarchhak State 8 atangin volunteer leh Official 300 vel an fuankhawm a ni.