SCERT Science Promotion Wing chuan November ni 24-25, 2016 chhung khan Don Bosco School, Lawngtlaiah Mizoram State Level Science, Mathematics and Environment Exhibition for Children 2016-2017 a buatsaih a. Thupuiah “Ram hmasawn nan Science, Technology leh Mathematics” (Science, Technology & Mathematics for Nation Building) tih hman a ni.

He exhibition hi LADC-a Executive Member i/c Education Pu Laltlawmlova Chinzah chuan a hawng a. Lawngtlaia state pum huap exhibition buatsaih a ni chu lawmawm a tih thu sawiin, chu chuan zirlaiteah hmasawnna leh tumruhna nasa tak a pek belh ngei a beisei thu a sawi a. Thiamna tak tak nei turin a bu chhiara vawn ringawt a tawk tawh lo tiin, kan thil thiamte hman tangkaina tur hriat chu thiamna tak tak lan chhuahna zawk a nih thu a sawi. Pu Laltlawmlova Chinzah hian zirlaite model pho chhuahte chu a en kual nghal bawk.

A kharna inkhawmah Lawngtlai DRDA Project Director Pu H.Dolianbuaia chu Khuallian a ni a. Exhibition-a tel zirlaite’n an thiam thil pho chhuahna remchang an nei chu vannei a tih thu sawiin, hma lam pan zel turin duhsakna a hlan a. Hlawhtling tura kawng tha ber chu taima taka lehkha zir a nih thu sawiin, harsatna tam tak pal tlanga lehkha zir chuan a tawpah rah duhawm zawk a chhuah ngei ngei thin, a ti. Pu H.Dolianbuaia chuan zirlaite chu an thiamna leh theihna tipung zel turin a fuih a. Exhibition lawmman a sem nghal bawk.

He exhibition hian a tum chu, thangtharte rilrua science hlutna tuh a, an hriatna te chher hriam a, ram hmasawn nana ngaihtuahna seng tura fuih leh an thiamnate chhawr tangkaitir a ni.

He exhibition-ah hian Mizoram chhung district hrang hranga sikul 30 vel atangin zirlai 90 vel an tel a. He’ng zirlaite hian thupui paruk awm zinga an duh ber pakhat hmanga model an siam chu an pho chhuak a ni. Thupui then tinah hian lawmman pakhatna atanga pathumna thleng siam a nih bakah, participation prize siam a ni bawk a. Zirtirtu ti tha (best guide teacher) panga thlan chhuah an ni bawk. Thupui then tina a ti tha zual pathumte atang hian National Level Science Exhibition-a tel tur la thlan chhuah leh tur a ni.