Mizoram Higher Secondary School Games vawi 12-na chu vawiin khan tan a ni a, a hawnna programme hi Lammual ah buatsaih niin Pu K. Lal Nghinglova, IAS, Commissioner & Secretary, Education & Human Resource Department chuan a hawng a ni.

Pu K. Lal Nghinglova chuan naupang kalkawmte chu fuihin infiamna khawvelah Mizoram ti hmingthatu an nih ngei a beisei thu a sawi a, rilru thianghlim pua huaisen takin inelna thianghlim tak nei turin a chah bawk a ni.

Games hawnna inkhawm hi Pu P. Lalchhunga, IAS, Director, School Education Department chuan kaihruaiin inlawmna thuchah a sawi. Pu J.H. Biakmawia, Joint, Director, School Education Department chuan Mizoram Higher Secondary Games chungchanga report tawi a sawi bawk a ni.

Mizoram Higher Secondary Games hi kum 1999 atanga neih chhoh tan niin tun tumah hian sikul 27 an tel a, chung zingah sikul 12 te chu Aizawl pawn a mite an ni. Zirlai naupang 1391 telin chung zingah 432 chu Aizawl pawm lam mite an ni a, heng naupang te hi zirtirtu 133 (Aizawl pawn atangin zirtirtu 46) in an ho a ni.

Infiamna chi hrang hrang 8 - (i) Athletics (B&G) (ii) Badminton (B&G) (iii) Basketball (Boys) (iv) Football (Boys) (v) Hockey (Girls) (vi) Judo (B&G) (vii) Table Tennis (B&G) (viii) Volleyball (B&G)-ah te inelna neih a ni dawn a ni.

Higher Secondary School Games hi December ni 13 ah a tiak ang.