Mizoram Hindi Prachar Sabha (MHPS) in kum 2 dana an neih thin ‘Biennial General Conference-cum-Election’ chu vawiin khan Agriculture Conference Hall-ah neih a ni a, Education Minister Pu Lalsawta chu Khuallian chan changin he hun hi a hmanpui a ni.

Biennial Conference hawnna inkhawm MHPS President Pu P.B.Lalbiakliana kaihhruaiah Khuallian Pu Lalsawta chuan “Hindi chu India rampuma tawng hman uar ber a nih avang te, Hindi thiam loh avanga Mizote kan nih tur ang kan nih loh fo thin avang leh tawng thiam tam hi mihringte tan thil tangkai leh hlu tak a nih avangin Mizo fate hian Hindi i thiam ang u”, a ti. Mizoram chhunga Hindi Certificate lem pe chhuak thin leh hmang thin an awm tih sawiin Minister chuan hei hi Zofate tana thil pawi tak thlen tir theih tu a ni a, hetiang thil sual ti duh tute chu kan ram leh hnamin a mamawh lo, a ti bawk. Pathian rawngbawlna-ah pawh ramchhung hmun danga fehchhuahin Hindi tawng thiam hi a laimu ber a ni, Pu Lalsawta chuan a ti.

MHPS Secretary Pu John P.C. Rema chuan Annual Report pein MHPS Office Building sakna tur hmun chu sorkarin New Secretariat Complex chhungah a pek thu a sawi a. MHPS hnuaiah hian zirlai 1000 chuang engtiklai pawhin an nei reng a, Exam Centre pawh hmun 9 - Aizawl, Lunglei, Serchhip, Lawngtlai, Champhai, Kolasib, Saiha, Saitual leh Chawngte - ah te neih a ni tawh. Hindi hmasawnna tura hmalakna chi khatah Mizoram State Sports Council te nen tangkawpin Mizoram atanga State, National leh International Players turte tan thla khat chhung Spoken Hindi Class neihpui a nih thin thu a sawi bawk.