Mizoram Governor Lt Gen Nirbhay Sharma (Retd.) chuan tunhnai a ruahsur nasa vanga Mizoram hmun hrang hranga harsatna hrang hrang tawktu te, in leh lo chan mai nilova nunna hlu tak hial chantate an awm chu pawi a tih tak zet thu a sawi a. Nunna hlutak chantute chhungkua, in leh lo bakah sumtak tak hu bungrua, ruahsur, thli leh tuilian in a tichhiatsakte chu thinlung takin a tawrhpui tih a tarlang a ni.

Governor chuan Sawrkarin a theihtawp chhuahin chhawmdawl hna a thawk mek tih tarlangin hun harsa tak Mizoram in a tawh mek lai hian kan za in insak dan bakah kan chenna  in leh a chhehvel kan sawngbawl kawngah fimkhur a tul zia hriatnawn a tha tih a tarlang a. Fimkhurna leh sawrkar inkaihhruaina te zawm chunga hmalakna chauh chu  chhiatrupna liantham zawk pumpelh theihna a ni a ti.

Aizawl ang khawpui lian, mihring bitna hmun  leh insakdan kalphung mumal tawklo  ah chuan chhungkawtinte fimkhur tlan ngai a. Fimkhurlo te avangin mi zawng zawng dinhmun hlauhthawnawm a awm theihna a ni a ti a. Remchanna leh ruahmanna felzawk awm thei ang apiang te rilru a dap chungin chhungkaw tin ten insakdan kalphung fel tak, thuneituten uluk taka an ngaihtuah hnua an duan te reng reng chu zawm tlan vek a hun tawh takzet a ni a ti.

Governor chuan ," He hun harsa taka Chhanchhuah hna, thawmthat hna, chhawmdawlna leh tanpuina pe tur thawkchhuak te hmalakna ah hian Sawrkar, khawtlang mipui tlawmngaite leh pawl hrang hrang hmalaknate te hi ka thlawp tlat a. He kan vanduaina atang kan inbihchian a, kan hmalam hunah ruahpui leh thlipui nasa  emaw lirnghing pawh lo thleng palh se mipui leh kan in leh lo bakah kan bungrua te piah lamah kan nunna hlutak te kan humhim theih hi ka beiseina a ni", a ti a. "A tawp berah chuan nunna hlutak chantu chhungkua zawng zawng leh an in bakah bungrua, sum tam tak man chantu te zawng zawng thinlung takin ka tawrh pui a. He dinhmun atang hian Mizo mipui te chu a hma aia chak zawkin kan rawn dinchhuah ngei ka ring", a ti.