Vawiin khan Environment, Forests & Climate Change Department chuan tunhnaia department hmalakna leh hlawhtlinna te thlirhona neiin, Mizoram sawrkar Cabinet Meeting-in 8.6.2017-a Zoram mipuite mamawh em em leh private plantation neitute tana hamthatna thlen thei tur Saw Mill Rules-a pawm tak chu hman vat a nih theih nan Department inbuatsaihnate sawiho tel a ni.
He meeting hi Pu Lalram Thanga, Principal Secretary & PCCF Mizoram chuan hmanpuiin, Master Roll a kum rei tak lo thawk tawh mi 45 te regular appointment order a hlan a, EF&CC Department hlawhtlinna hrang hrangah thawktute hnenah lawmthu sawiin, taima leh rinawm taka nasa lehzuala thawk turin thawktute a ngen nghal a ni.
He meeting-ah hian Pu Lalthangliana Murray, CCF (Administration) chuan Department hlawhtlinna dangte tarlangin, Thorangtlang Wildlife Sanctuary zauhna atan khaw pahnih- Kawnpui West leh Darngawn khuate atanga chhungkaw 145 sawnchhuahna tur cheng nuai 1450 sawrkar laipuiin a sanction tawh thu leh, Dampa Tiger Reserve zauhna turin Serhmun khua sawnchhuahna tum mek anih thu te, chumi atan chuan sawrkar laipuiin pawisa a sanction tawh thu tarlan a ni bawk.
Climate Change hnuaia Bamboo Project, GIZ, INBAR leh Ministry of DoNER te thawh ho na tur peihfel tep a ni a, he project hnuaiah hian chhungkaw 500 thlanchhuah an ni ang a, mau hmanga eizawnna ngelnghet siam sak an ni ang. He project atana sum mamawh chu Ministry of DoNER in a tum dawn a ni.
He meeting-ah hian tun hnaia Cabinet Meeting in Direct recruitment- UDC -15, LDC -10 leh Forest Guard- 50 tan a phal sakna leh Forester post 20 pawh Deputy Ranger a upgrade turin a phalsak thu tarlan a ni bawk.
