Mizoram Governor Lt. Gen. Nirbhay Sharma, PVSM, UYSM, AVSM, VSM (Rtd.) chuan YMA pualin mipui chibai a buk a. He ni kan hman hian YMA hnathawhte mipuiin kan hlutzia a tilang a ni, a ti.

Governor chuan YMA chu tanpui ngaite tanpui anihna chiang takin a lantir thin thu leh, chungah chuan chi leh hnam karah emaw, hausa leh rethei emaw pawh thliar lovin khawtlang thatna tura thawktu, mipui tanpuitu a nihna chu ram pum tan entawntlak a tih thu a sawi a. Ruihhlo dona kawnga YMA hnathawh leh hmalakna chu fak bawkin, hemi kawnga state tan boruak danglam leh tha zawk siam theitu dik tak an nia a hriat thu a sawi a. Mizoram hrisel zawk siam a nih ngei a beisei thu Governor chuan tarlangin, ruihhlo mai bakah zu leh vaihlo hman nasat avanga cancer leh natna hrang hrang dang Mizorama hluar ta em em te pawh a lo ziaawm theih nan YMA chuan hma la tel se, a ti a. YMA member te chu hriselna kawnga mipui zirtirtu leh tihhmuhtu an nih phawt chuan Mizoram chu State dangte tan entawntlak a ni vat a rin thu a sawi bawk.

YMA chuan thing leh mau, nungcha leh lui humhalh kawngah hma la zel se a duh thu Governor chuan a tarlang bawk a. Mizoram chu kan tu leh fa te tan, hun lo la awm zel turah pawh hmun nuam leh chen tlak a nih reng theih nan hmalak a tul thu sawiin, Aizawl ah chuan Chite Lui chu bultanna ni se, a ti a ni. Governor chuan member zawng zawngte YMA Day hlimawm tak an hman theih nan leh, Mizoram chauh nilo ram pum tana mipui rawngbawltu an nih chhunzawm zel  a duhsak thu a sawi a ni.