India ram leh khawvel ram hrang hranga kum tin a hman thin International Literacy Day chu September ni 8 hian Mizoram-a khaw paruk (6), Thenzawl, West Phaileng, Darlawn, Keifang, Bairabi leh Hnahthialah te School Education Department hnuaia Adult Education Wing buatsaihin hman a ni dawn.
International Literacy Day hi mimal leh vantlang mipuiin ziak leh chhiar thiam pawimawhna an hriatchian a, ziak leh chhiar thiam tawhte pawhin a la thiam ve lote thiamtir tura inpekna kan neih thar zel theih nana infuihna hun UNESCO chuan 17.11.1965 khan khawvel ram tina hman turin a rel a; 1966 atang khan kumtin khawvel ram hrang hrangah hman thin a lo ni ta a ni.
India ram pumah chhiarpui hnuhnung ber (2011)-a a lan dan chuan ziak leh chhiar thiam lo (kum 7 leh a chung lam) mi 272950015 zet an la awm a; chung zinga 96568351 chu mipa an niin, 176381664 chu hmeichhia an ni a. Mizoramah chuan kum 2011 chhiarpui (provisional)-ah mipa 29425 leh hmeichhia 48461, a vaiin mi 77886-in ziak leh chhiar an la thiam lo a; Mizoram literacy dinhmun chu kum 2011 chhiarpuiah chuan 91.58% niin India ramah 3-na kan nih bakah, India ram District hrang hrang zingah Serchhip District chu literacy-ah 1-na niin, Aizawl District chu 2-na a ni bawk. Chhiarpui hmasa zawk (2001) aiin 2.78%-in hma sawn mah ila, ramri hrula kan unau Chakma leh Tuikuk, etc. leh khawchhak lam atanga kan unau rawn raltlan te, Tripura leh Manipur atanga rawn pem lutte zingah hmasawn chak a harsat avangin, mihring tlemte mi 64,429 lek awmna Lakhsahdweep chuan kan dinhmun 2-na min rawn luahlan ta a ni.
Ziak leh chhiar thiamna hi ram hmasawn nana pawimawh hmasa a nih avangin Mizoram sawrkar chuan a ngai pawimawh em em a; kumin International Literacy Day pawh hi tangkai taka hman a, ziak leh chhiar la thiam lote pawhin thiam duhna tak tak nena an zir chhoh theih nan leh, a thiam tawhte pawhin la thiam lote thiamtir tura inpekna thar kan neih theuh theih nana infuih thar leh nan tiin, International Literacy Day 2011 hmang tur hian SDO (Civil) leh School Education Department hotute pawh an fehchhuak mek a ni.
