Tukin khan Rashtriya Ekta Diwas (National Unity Week) denchhenin Mizoram hmun hrang hrangah School Education Department buatsaihin “Unity Run” neih a ni a. Aizawl-ah chuan zing dar 6 khan Chanmari atangin Vanapa Hall kawt thleng High School leh Higher Secondary School Naupang sangkhat bawr velin tlan in, School Education Department Joint Director Pu S. T. Zaduna’n a vailiam a ni.

Vanapa Hall kawta inkhawm tawi neihah School Education Secretary Pu P. Lalchhuanga chuan Sardar Vallabhai Patel piancham vawi 140-na denchhena Unity run chu neih a nih thu sawiin, Sardar Vallabhai Patel chu India ram zalenna sualnaah sulsutu langsar a nih thu leh, ramin zalenna a neih hnuah Home Minister leh Deputy Prime Minister hmasa ber anih thu te a sawi a. Ramin zalenna a neih hnuah Raja-in ram 565 an awp thin ang khan awp leh an tum chu Patel-a remhriat leh a dawr thiam avangin India ramin tun hi kan thleng thei a ni a ti a. Sadar Vallabhai Patel chu ramin a chhuangin a chawimawi hle a ni a ti.

Secretary Pu P.Lalchhuanga chuan Unity Run-a telte chu Unity Week hman a nih chhan Sardar Vallabhai Patel-a hnathawh hre reng a, he inpumkhatna week hlawhtling taka hmang turin a sawm a. India hi kan inzawmkhawm a, thendarh tumtu laka kan hum tlat chuan ram hmasawn kan ni zel dawn a ni ti.

Unity Run hi District dang khawpuiah te pawh hman a ni a; Tukin khan District khawpui hrang hrangah District Education Officer-te kaihhruaina hnuaiah he inpumkhatna week hman tan nan hian Unity Run hi neih a ni.