Vawiin khan Parliamentary Secretary Pu Hmingdailova Khiangte, Hockey Mizoram President ni bawk chuan a Office Chamber-ah Hockey Mizoram hruaitu dangte nen One Million Hockey Legs (1MHL) Adviser/Co-ordinator Pu Aribam Nandy-a an kawm a. Mizoram-a Hockey tihhmasawn theih dan tur kawng hrang hrang an sawi ho.
Hockey Mizoram President Pu Hmingdailova Khiangte chuan Mizoram sawrkar leh Hockey Mizoram-in Hockey hmasawn nana hma an lak dan hrang hrang sawiin, 1MHL hmachhawp hrang hrangte chu phurpuiawm hlea a hriat thu a sawi a. Sawrkar hotute hma lakpuina zarah an hmachhawpte pawh a hlawhtlin zel a beisei thu a sawi bawk.
Pu Aribam Nandy-a chuan India rama Hockey tih-lar leh tihhmasawn a nih theih nana 1MHL-in hma a lak dan hrang hrang tarlangin, Mizoram-ah pawh 1MHL Project kalpui ve an duh thu a sawi a. Mizo naupangte’n Hockey khel turin theihna an nei a, hmasawn zel tur erawh chuan khelmual tha (artificial grass phah ngei) an mamawh a ni, a ti. Hockey Mizoram nena Memorandum of Understanding (MoU) neih a niha 1MHL-in Project an kalpui dan tur sawiin, Pu Nandy-a chuan Mizoram-a Hockey hmasawn nan Project hrang hrang hnuaiah kum 2/3 chhung Dutch High Performance Coach-te’n Mizo Hockey Coach-te ngun takin an zirtir ang a, Mizorama sikul tam tak atangin Hockey khel tur zawn chhuah niin, Hockey khelhna bungrua (equipment) tul ang zawng zawng pawh a thlawna sem tur a ni ang, a ti.
He hunah hian Hockey Mizoram Senior Vice President Pi Zothankimi leh Vice President & Senior Hockey Coach Pu K.Lalthlengliana te chuan President hi an tawiawm a. MoU ziak a, Project siam tur chuan Executive Committee-ah thlen chhoh va, Chief Minister leh Sports Minister te remtihna leh ngaihdan te pawh lak ni se, an ti a. Project kalpui nana sum mamawh tur pawh North Eastern Council (NEC)-a dil a tul an rin thu an sawi bawk.
1MHL hi India rama Grassroot level Hockey tihhmasawn nana Netherlands leh India sawrkar thawh dunna a ni a. He Project hnuaiah hian kum 2018-a India ramin Hockey World Cup a thlen hunah chuan India mi Hockey khel thiam mi maktaduai khat tal chher chhuah hman tum a ni.
