3604/2023-2024

Aizawl 1st February, 2024 : Vawiin khan Aijal Club-ah Mizoram Horticulture Service Association te'n 26th- General Conference an hmang a. Prof. Lalnilawma, Horticulture Minister chuan he hun hi khuallian niin a hmanpui.

Horticulture Minister chuan MHSA Member-te chu Department hmasawnna tura theihtawpa an suangtuahna seng tura chahin kan suangtuahna te a taka kan bawhzui zel chuan kan ramin hma a sawn ngei ka beisei a ni a ti. Ei leh bara kan intodelhna kawngah Horticulture Department chu a pawimawh berte zinga mi kan nih angin kalphung thar Sorkar kan nih ang ngeiin a ngai pet peta kal lovin thil danglam thlentirtu nih tum theuh turin a chah a. Thleibik nei lova mi taima leh a thawk tha te beneficiary an thlan thin tur thu sawiin Sorkar Policy tihlawhtling turin Export Oriented leh result oriented lamah an ngaihtuahna te hmang turin a chah a. Kan rama Mau te pawh kan neihsa hman tangkai a, sawngbawl dan ngaihtuah phawt chu kan tih hmasak tur a ni a ti.

Minister chuan kan enkawl kuthnathawktute chu thingtlang mi, thil hre zau lo zawk leh inthlahrung tak tak te an nih angin Department Officers leh thawktute chu hawihhawm taka lo dawngsawng thin turin a chah a. Kuthnathawktute nen inpawh tlang taka kan that tlanna tura tangrual thin turin leh an thlaithar te value added zawnpui a, an income tihpun dan tur ngaihtuah thin turin a chah bawk a ni.

Pu C.H. Lalmuanpuia, Director & Adviser, MHSA chuan an member thar paruk lawmluhna hun a hman bakah thu a sawi bawk a ni.

Pu Lalremruata, General Secretary, MHSA tarlan danin tunah hian Member 55 an awm mek a. Dr. Jenny Zoremthangi, Dy. Director chuan MHSA thupui "Mizoram Horticulture - In Development and way forward" tih hmangin kalkhawmte zirtirna a pe a. Mizoram zau zawng 21,081 sq. Km atangin Potential Horticulture Area hi 11.56 lakh Ha (55%) anih laiin tuna Horticulture Area kan neih mek hi 1.5 lakh Ha (13%) chauh anih thu a tarlang a. Sorkar policy 'Bana Kaih' (hand holding policy) hnuaiah thlai pathum Aieng, Sawhthing leh Mizo Hmarchate chu horticulture department hnuai a awm a nih avangin theihtawpchhuaha hmalak dan tur a tarlang bawk. Pu T. Vanlalthlana, Vice President, MHSA kaihhruaina-in Member thi sunna hun hman a ni bawk.

Vawiin hun hi hun hnih chawhma leh chawhnu hunah then niin chawhma hun hi Pu L. Lalhmingmawia Pachuau, President MHSA chuan a kaihruai a. Dr. Robert Lalrinsanga, Fin. Secretary, MHSA chuan lawmthu a sawi. Chawhnu hun hi Pu T. Vanlalthlana, Vice President, MHSA -in kaihruaiin rorel anih bakah Dr. Carmelita Lalchhanhimi Pachuau, Treasurer hnen atangin sum dinhmun ngaihthlak a ni a. Pu L. Lalhmingmawia Pachuau, Addl. Director-in Presentation neiin Pu Manthanga Tochhawng, Asst. Secretary, MHSA chuan lawmthu a sawi a ni.