No.763/2020-2021

Health Minister Dr. R. Lalthangliana chuan vawiin chawhnu khan West Bengal sawrkara Minister of State for Health & Family Welfare Pi Chandrima Bhattacharya bia in nimin tlaia an inbiak veleh rang taka hma a lo lak avanga lawmthu hrilhin, COVID-19 vanga West Bengal-a mizo ten harsatna dang an tawk leh a nih pawha theihtawp chhuaha tan lo lakpui nghal zel turin a ngen a. Pi Chandrima Bhattacharya pawhin theihtawp an lo chhuah zel tur thu in a chhang a ni.

AMRI Hospital, Kolkata a mizo cancer vei damlo pahnihin COVID-19 natna an kai a ni tih hriat a nih veleh hian Health Minister Dr. R. Lalthangliana chuan West Bengal Health & Family Welfare hi be nghalin ani hian daktawr thiam bik pakhat Kolkata Mizoram House (Salt Lake) ah a tir nghal a, Mizoram House Joint Resident Commissioner Pu Jacob Lalawmpuia nen ruahmanna siamin hma an la nghal a. COVID-19 natna kai damlo pahnih te hi COVID-19 vei dahna tur bika ruat Hospital-ah dah nghal niin, a tul ang angin contact tracing an ti chhunzawm nghal a, Mizoram House (Salt Lake) a awm mi 18 chu nizan dar 9:00 khan Kolkata a quarantine centre tha takah dah nghal an ni a. Mizoram House (Salt Lake) a thawk hnamdang pakhat pawh vawiin hian quarantine centre ah dah luh leh a ni bawk.

Health Minister chuan Kolkata-ah mizo COVID-19 vei hmuhchhuah chu pahnih chiah an la awm tih sawiin thuthang diklo vanga chi-ai lo turin mipuite a chah a, vawiin lama cancer vei pakhat dang COVID-19 positive thar awm anga sawi pawh chu thudiklo a ni tih a sawi a. Kolkata Mizoram House Joint Resident Commissioner pawh bia in an dinhmun te Chief Minister Pu Zoramthanga’n a hriatpui thu leh a ngaihven reng thu hrilhin harsatna leh tanpuina an mamawh chuan Chief Minister hovin an inhawng reng a ni tih a hrilh a ni.