Ni hnih awh ‘Workshop on Human Development Report in Mizoram’ chu vawiin khan Planning Minister Pu H Liansailova’n Tourist Lodge ah a hawng. He Workshop-ah hian Education Minister Pu Lalsawta, State Planning Board Vice Chairman Pu Lalkhama IAS, Secretary State Planning Board Pu P L Thanga IAS te bakah Department hrang hrang hotulu leh aiawhte bakah Mizoram University-a zirtirtu thenkhat an tel a ni. Mizoram Human Development Report hi Institute of Human Development New Delhi in an buatsaih a ni.

Pu H Liansailova chuan Mizoram in a vawikhatna atan Human Development Report a nei chu thil chhinchhiahtlak leh rahbi thar kaina a nih thu a sawi a. Minister chuan Human Development Report chuan Sorkarin ruahmanna thar a siamna kawngah puitu leh kawng kawhmuhtu pawimawh tak anih theih bakah hmasawnna peng hrang hrang a bikin zirna, hriselna leh mipa leh hmeichhe intluk tlanna bihchianna a ni a ti. Report chuan 12th Five Year Plan siamna kawngah nasa takin a pui theih thu Minister hian a sawi bawk a ni.

Pu Lalsawta chuan Human Development Report chu Sorkar leh mipui tan hmanraw pawimawh leh tangkai tak anih theih thu a sawi ani.Worshop a hian Pu P L Thanga chuan Human Development Report kalpui dan tlangpui leh an thil zirchian chungchang a sawi. Institute of Human Development atangin Prof. R P Mangam, Miss Diksha Arora leh Prof. Atul Sarma te chuan Report chungchangah presentation an nei a ni.

Mizoram Human Development Report(Draft) 2011 chuan District hrang hrang leh Mizorama hnam hrang hrang ten Zirna, hriselna, mipa leh hmeichhia te intluk tlanna leh eizawnna kawnga an inthlauhna dan a tarlang a. Draft Report in a tarlan dan chuan Mizoram chu India a Human Development Index (HDI) nei sang pawl niin Mizoram HDI chu 0.651 a ni a, India HDI hi 0.467 a ni. Mizoram bakah state dang pahnih chiah in HDI 0.65 vel an nei ve a ni. Aizawl District HDI chu 0.747 niin a sang ber a, Lawngtlai District HDI chu 0.551 niin a hniam ber thung a ni. District dang HDI te chu –Serchhip – 0.733 ; Mamit – 0.72; Lunglei – 0.692; Champhai – 0.671; Kolasib – 0.665 leh Saiha – 0.639 a ni.

Health Status Index ah chuan Champhai District a sang ber a, a hniam ber chu Lawngtlai niin, district hrang hrang te Health Status Index chu – Champhai – 91; Serchhip – 89.3 ; Kolasib – 88.1; Aizawl – 87.2 ; Saiha – 85.1; Lunglei – 80.5; Mamit – 74.7 leh Lawngtlai – 71.9 a ni.

Health Infrastructure Index a Aizawl a sang ber a, Lawngtlai a hniam leh ber a ni. District hranga Health Infrastructure Index chu – Aizawl – 0.75; Saiha – 0.73; Lunglei – 0.53; Kolasib – 0.52; Serchhip – 0.52; Champhai – 0.46 Mamit – 0.29 leh Lawngtlai – 0.01 a ni.

Educational Achievement Index (EAI), Employment and Livelihood Index (ELI) leh Gender Development Index (GDI) ah te Aizawl District chu a sang ber a, a hniam ber chu Lawngtlai District a ni. Mizoram GDI chu a pumpuiin 80.1 a ni a, District hrang hrang te GDI chu – Aizawl – 84.9; Kolasib – 81.4; Champhai – 79.5; Saiha – 78; Serchhip – 78; Lunglei – 74.4; Mamit – 71.7 leh Lawngtlai – 69 a ni.