Vawiin khan nikhat awh "Regional Workshop on Sustainable Development Goals(SDG)" chu ATI Auditorium, Aizawl ah hman a ni a. Regional Workshop hi NEC leh Planning & Programme Implementation Department tangkawp in an buatsaih niin Planning Minister Pu Lalsawta chuan khuallian niin a hmanpui a ni. Worshop chhung hian hmasawnna ngelnghet a thlen theihna tura SDG huanga thiltum leh inzirtirna te mithiamte hnen atangin ngaihthlak a ni a. He hunah hian sawihona hun, zawhna leh chhanna hun  pawh buatsaih a ni bawk a ni.

Minister Pu Lalsawta chuan Regional Workshop Aizawl, Mizoram a nghah anih chu lawmawm a tih thu sawiin Sustainable Development Goals chu United Nations member ram zawng zawngin lungrual taka tihhlawtling tura tan an lak a pawimawh thu sawiin. Ram pum huap leh State mal anga hmalakna thuah pawh luangrual tak leh rilru thuhmun pu a tan lak a ngaih thu a sawi. Kum zabi 18-na velah mumal taka India leh ramdang te an insumdawn tawn tawh laiin Mizoramah chuan Development kawnga hmalakna chu hmanni lawk anga sawi theih a ni a. Nimahsela, kawng tinrengah Mizoram chu a tan tlai hnufual nimahse, hmasawn pawl tak a ni thei zel a. SDG thil tumte tihhlawhtlina kawngah pawh Mizoram chu chak taka hmalatu State zingah a tel theia thil lawmawm tak a ni a ti. SDG Vision 2030 pawh SDG tihlawhtlin anih theih nana mumal taka Mizoram mil zela duan bik pawh siam a nih tawh thu te leh chak taka NEDP hmanga SDG Vision 2030 hi tihlawhting tura hmalak anih thu a sawi. Planning Minister Pu Lalsawta chuan tunhnaiah pawh sik leh saah khawvel a danglam nasa tih sawiin ruah tam lutuk leh khawlum zual te pawh ramdangah chauh hmuh a ni ta lova; Mizoramah ngei pawh sik leh sa inthlak danglam nasa tak avangin harsatna tam tak a thleng der tawh a ni a ti a. Chuvangin, kan chenna hualveltu, Environment ti chhe si lova hmasawnna kawnga ke pen thiam dan ngaihtuah tlan leh zawm tlan chu sawrkar leh mitin mawhphurhna a ni tawh a ni a ti.

Inaugural Session hi Planning Secretary Dr C. Vanlalramsanga chuan a kaihruai a. Ram pawn atanga lokalte lawma thu sawiin Mizoram in SDG tihhlawhtlinna tura NEDP leh CSS te hmanga hmalakdan tur tlangpui sawifiahin Monitoring Committee te, Technical Committee te dina SDG Cell bik pawh Planning Department-ah din anih thu a tarlang a. SDG thiltum tihlawhtling turin ram leh State tin thawhhona tha a pawimawh  a. Thawhhona tha siam tur leh sawihona tha zawk a awm theih nan Workshop pawh hi buatsaih a ni a ti.

Inaugural Session-ah hian Prof K.R.S. Sambasiva Rao, Vice Chancellor, Mizoram University, ICFAI University Vice Chancellor Lt General (Dr.) A.K. Mishra,(Retd.) leh Pi Supriya Khound,  State Technical Officer, UNDP  North East India te hnen  atangin thusawi ngaihthlak a ni a.

Hemi hnua Technical Session pahnihah hian Pu Lalchhuanawma Hrahsel, Director, Economics & Statistics leh Pu GN Sinha, Consultant Advisor, Government of Arunachal Pradesh te kaihhruaina hnuaiah thupui - ' Overview of SDG", '"SDG Implementation, Strategic Plan and SDG Key indicators"', "Localising SDG at the sub-state level in the North East India" leh "Sensitising and Engaging Local Stakeholder - District Level and Local Communities on SDG" hmangin mithiam ten zirtirna an pe a. Technical session-ah te hian resource person a hman te chu - Pu Sundar Mishra, NITI Aayog aiawh a lokal te, Pu Shri Akhilesh Kumar - Representative from Ministry of Statistics and Programme Implementation, Government of India aiawh a lokal te, Pi Supriya Khound, UNDP aiawh a lokal te; Pu J.C. Phukan, Centre for SDGs, Assam Administrative Staff College te, Pu Geetashri Sarma, Transformation & Development Department, Government of Assam te, Pu G.N Sinha, Advisor, Government of Arunachal Pradesh te; Dr Th Munindro Singah, Director, Planning, Government of Manipur te, Dr R.K. Tombisana Singh, Government of Manipur te leh Pu Wankit Kuper Swer, Government of Meghalaya aiawh a lokal te, leh Pu Lalchhuanawma Hrahsel, Director, Economics And Statistics, Government of Mizoram te an ni a. Regional Workshop on Sustainable Development Goals(SDG) hi state hrang hrang aiawh official te, Mizoram sawrkar hnuaia Planning  leh Development kaihhnawih khawihtu Department zawng zawng aiawhtu Official pawimawh te leh College zirlai ten an chhim a ni.