Vawiin khan Minister Pu John Rotluangliana chuan Mizoram Students’ Union (MSU) buatsaih  Ni hnih awh tur Kulva Cultural Competition, Electric Veng YMA Hall-ah hawnna hun a hmang.

Minister chuan thusawiin MSU te’n Mizo Hnam chawimawina atan competition an buatsaih chu lawmawm, a ti a. Mizo Culture vawn him kawngah mawh kan phur theuh a, Culture kalsan chu hnam bo a ni, a ti bawk a ni. Mizo te zirna lamah kan tan nasat a ngai em em a, hna pawh Mizoram chhung chauh nilo, hmun dangah te pawh thawk hrelo turin  zirlaite a chah  a. India ram leh pawna Mizo hnathawkte hi Mizo tan vek an tangkaiin, an pawimawh a ni, tiin a sawi a. Khawi hmunah pawh awm ila, Mizo Culure vawnhim zel hi Mizo te tih makmawh a ni, a ti bawk a ni. Social Media hman chungchangah fimkhur turin leh tangkai zawk leh ngaihsan dik ngaihsan kawngah hmanruaa hmang zawk turin zirlaite a ngen bawk a ni.

He Cultural Competition-ah hian zirna in hrang hrang paruk tellin, intihsiakna tur atan Hnam Lam- Buhzaih Cheraw, Solakia bakah mimal in elna tur hmeichhe tan Buhthlei leh mipa tan Hlado chham te hman a ni dawn a. Buhzaih Cheraw leh Solakia hi Group khatah dah niin, lawman pakhatna hian Certificate leh Rs.30,000 a keng tel ang a, pahnihna in Certificate leh Rs. 20,000, pathumna in Certificate leh Rs. 10,000 an dawng ang. Intihsiakna a tel zawng zawngte hian Rs 3000 leh Certificate an dawng vek bawk dawn a ni. Mimal intihsiakna Buhthlei leh Hlado chham bikah a hran ve ve lawman siam a ni a. Pakhatna in Rs.3000 leh Certificate an dawng ang a, pahnihna in Rs 2000 leh Certificate, pathumna in Rs 1000 leh Certificate a keng tel dawn a ni. Ni hnihna hi Vanapa Hall-ah neih tur niin, lawmman semna leh kharna hun hman a ni ang.