Nimin khan District Fisheries Development Officer’s Office Champhai District bultumin Ngopa Group YMA Hall Zawlbuk-ah Sangha khawitute tan Training buatsaih a ni.

He hun hi Pi Lucy Lalrinpuii, District Fisheries Development Officer (DFDO) Champhai chuan kaihhruaiin, Sangha khawitute chu Sangha thar chhuah kawngah tan la leh zual turin a fuih a. Central Scheme hrang hrang hnuaia Dil thar laihna leh cheithatna sum dawngtuten Champhai District Sangha tharchhuah ti pung zual tura tan an lak a ngaih nasat thu a sawi a. Training-ah hian Pu K.Lalrinmawia, Fisheries Extension Officer (FEO) chuan Sangha chaw pek that pawimawhna a sawi a. Pu Lalchhuanawma, Fishery Demonstrator (FD) in Common Carp tui tir dan sawiin, Pu Lalmalsawma, Fishery Demonstrator (FD) chuan dil enkawl dan a sawi bawk a ni.

Chawhnu lamah Training neih chhunzawm niin Sangha khawitute tan zawhna leh chhanna hun hman a ni a. Department hmalaknate hrilhfiah a ni a, Sangha khawitute pawhin Training hun tha tak an nei thei chu lawmawm an tiin an hlawkpui hle a ni.