Vawiin chawhma khan Central Young Mizo Association (CYMA) Office Bearer-te chuan Mizoram Governor Pu Kummanam Rajasekharan chu Raj Bhavan-ah hmuin, inkawmna an neihpui a ni.

CYMA hruaitute chuan an pawl inrelbawl dan leh khawtlang tana an hnathawh te an sawi a. Tunhnaiah Mizo thalaite zingah ruihhlo hmang sual an pung thu sawiin,  thalaite ruihhloa an fihlim theih nan an puala skill development buatsaih a, chu chuan an hun awl te luahkhatin an hun tha te tangkai zawka an hman theih an rin thu an sawi a ni. Ruihhlo do kawnga hmalakna hrang hrang an neih te chu sawiin, tunhnaia Chief Minister zahawm tak kaihhruaina hnuaia Ruihhlo Do Core Committee din a nih thu an sawi a. Sawrkar laipui pawh inrawlh tura an duh thu leh Myanmar sawrkar ngei pawh ruihhlo do kawnga thawpui tura sawm tha an tih thu Governor chu an hrilh a ni.

Narcotics Control Bureau hotute chu Mizoramah rawn zinin, ruihhlo tawlh chungchang rawn zirchiang se an duh thu an sawi a. Ruihhlo leh dan loa rampawn atanga Mizoram rawn lut ru tur dang turin ramriah sipai tun aia tam zawk dah theih nise an ti a. Assam sawrkar-in National Register of Citizens (NRC) a puanzar tak zulzuia siam ve tha an tih thu an sawi lang bawk a ni.

He meeting-ah hian thei leh thlai thar vawn that leh a sawngbawl dan turte bakah bawlhhlawh sawngbawl dante an sawiho bawk a ni.