Vawiin khan Lunglei SP Office Chamber-ah Pu Lalbiakzama, MPS, Additional Secretary, Home Department hovin Lunglei Closed Circuit Television (CCTV) Project chungchang sawihona Press Meet neih a ni. He Press Meet-ah hian Lunglei SP Pu C.Lalthanmawia, SDPO Pu Zonun Thara, DIPRO Pi C.Lalremruati te telin  Lunglei District MJA President Pu H. Lalthansanga hovin MJA member thahnem tak an tel.

Pu Lalbiakzama chuan Lunglei CCTV Project chu Lunglei High Powered Committee (HPC) Vice Chairman Pu S. Laldingliana hmalakna a nih thu sawiin NEDP kaltlangin Rs. 1.45 crores ruahman a ni, a ti a. He CCTV Project kaltlang hian Lunglei khawpui chhung venhimna hna leh Traffic Control System tih changtlung a nih tur thu sawiin dan leh thupek kenkawh kawngah nasa takin hmasawnna a thlen dawn a ni, a ti a. Khawvel hmasawn zelah sualna hrang hrang lo pung chho mek lo do let a, chhui chhuak a, bei let tur chuan dan leh thupek kengkawhtute’n hmanraw thar leh tha an neih a pawimawh hle a. Aizawl City Surveillance Project ang bawkin hlawhtling taka kalpui a nih a beisei thu sawiin he CCTV Project hi Lunglei mipuite tan thil chhinchhiah tlak leh hmasawnna mellung pawimawh tak a nih thu a sawi bawk.

Lunglei CCTV Project hna hi kalpui thuai tur niin RS Traders, Aizawl ten CCTV bun hna hi an thawk dawn a, kumin October thla chhunga zawhfel hman tura beisei a ni. Lunglei khawpui chhung hmun pawimawh leh lun lai hmun 20-ah te camera hrang hrang 38 bun a ni dawn a. Hun lo kal zel turah camera dah belh zel a ni dawn a ni. Lunglei SP Pu C.Lalthanmawia kaihhruaina hnuaiah Control Room leh Sub Control Room dahna tur te ruahmanna fel tak siam a ni tawh bawk.