Art & Culture Department hmalakna-in vawiin khan Lok Sabha MP Pu CL Ruala’n Saansad Adarsh Gram Yojana (SAGY) Phase-II hnuaia Model Village atana a thlan Lengpui khua-ah Public Relations & Outreach Programme buatsaih a  ni a, Art & Culture Director Pu R.Hmingthanzuala khuallian niin Art & Culture Department hmalakna chi hrang hrang phochhuah a mipui hnena hrilhfiah a ni.

Lengpui Community Hall a he hun buatsaih ah hian Pu C. Laltlankima, Senior Research Officer, Tribal Research Institute chuan inkhawm a kaihruai a, Pu Lalchuailova, Deputy Director, Art & Culture Department-in SAGY programme hnuaia Lengpui model village atana thlan a nih avanga Public Relations & Outreach Programme hman anih thu leh an inbuatsaih dan te a sawifiah a ni. Khuallian Pu R.Hmingthanzuala chuan Art & Culture Department chu Department dang te anga lang theia hmasawnna ruhrel thawk a sum tam tak hmang ruih ruih chi anih loh avangin khawtlang hmasawnna an thawh hmuh tur a tam lova, amaherawhchu mizo hnamzia leh nihphung bakah rohlu te vawnghim a mipuite zirtirtu an nih avangin an pawimawh em em a, mi zawng zawng huap department an nih thu a sawi a  ni. SAGY in a tum ber pakhat chu khua leh tui tha, hawizau leh rilru puitling siam anih avangin an Department in Library te leh hnam lam leh zai, zia rang te zirtirna an kalpui thin chu SAGY tihhlawhtlinna pawimawh tak ani a ti a, hetiang atan hian engtiklai pawh a tanpui tura an in kau reng thu a sawi a ni.“Public Relations & Outreach Programme ah hian Art & Culture Department hnuaia peng pathum Tribal research Institute, Mizoram State Museum leh Mizoram State Archive  ten mipuite hmuh theih turin an hmalakna chi hrang hrang an phochhuak a ni.

SAGY in a tum ber chu Model Village a thlan chhuah te hmasawnna kawng hrang hranga hmalakpui a ni a, zirna in tihchangtlun kawngah te, hriselna kawnga hmalakna te leh in leh lo nei mumal lo te chhawmdawl te, Mizo ze mawi chawisan kawnga hmasawn tura mipuite fuihthar kawngah te hma lak mek a ni.