Ministry of Health and Family Welfare chuan kum 2017 leh 2018 inkara nu nau chunga thi tihtlem kawnga hnathawk tha state zingah Mizoram chu a thlang a. Hnathawk tha lawm man hi Hotel Hyatt Regency, New Delhi-ah June 29, tlai dar 5 khian Union Minister of Health & Family Welfare(MoHFW) Pu Jagat Prasad Nadda chuan a sem dawn a ni.
Nu nau chunga thi te tihtlem kawnga hma la tha zingah leh lawmman dawng tur zingah Mizoram State a tel thu hi kar hmasa, June 21 khan MoHFW Joint Secretary Pi Vandana Gurnani chuan e-Mail kaltlangin Health Principal Secretary Pu Lalrinliana Fanai leh Dr.Lalrozama, Mission Director, National Health Mission, Mizoram te a rawn hrilh a. Lawmman dawng tur hian Mission Director leh Dr Hmingthanmawii, State Programme Officer, Reproductive Child Health(RCH) te an kal dawn a ni.
NHM, Mizoram data in a tarlan dan chuan kum 2016 leh 2017 inkara nu nau chunga thi zat chu 20 an nih laiin kum 2017 leh 2018 inkarah nu nau chunga thi zat chu 14-ah a tlahniam tawh a ni.
Ni 21 April, 2018 khan Auditorium, Dr.RLM Medical College, New Delhi- ah Union Health Minister Pu Jagat Prakash Nadda chuan Mizoram State Quality Team hnenah hnathawh that chawimawina trophy a hlan tawh bawk a. He trophy hlan a nihna chhan hi National Quality Assurance Programe Mizoram hmalakna ah Civil Hospital Aizawl chu NQAS certified a ni a, India ram pumah he Certificate hi Civil Hospital in a dawnga, Hospital dang pakhat chiah he lawmman dawng hi la awm a ni.
