The Central Motor Vehicles Rules, 1989 Section-120 chuan lirthei silencer rin zawng bituk chin felfai takin a siam a, chu aia ring lirthei silencer hman khap tlat a ni. Aizawl khawpui chhungah hian lirthei LMV leh a bikin Two Wheeler ah danin a bituk aia ring silencer siam chawp (modified silencer) hmang engemawzat an awm tih hriat a ni a, Dan in a phal bak aia ring lirthei silencer hmangtute man chhuah hna hi tun atang chuan Traffic Police ten Sound Level Meter nen uluk zawkin an nei thin tawh dawn a ni. Lirthei silencer ring avanga man hnu, man nawn leh an awm a nih chuan an lirthei registration cancel thleng a hma lak a ni ang. Wrong Side (Vei lam) a midang lehpelh ching kan la awm a, hei hi a hlauhawmin chhiatna nasa zawk thlen thei a nih avangin tih loh tawp tur a ni.

Double Overtaking leh Road Divider pel a lirthei khalh hi Dan phal loh a nih avangin tihloh tur a nih thu Public Notice tih chhuah tawh chu lirthei hmangtute'n an zawm tha tan viau tawh niin a lang a. Hetih rual hian a bikin lirthei ke pali nei (LMV & above) khalhtute'n kawng hmangtu ve tho, two wheeler khalhtute kalna tur kian zawngin veilam nek thei ang bera lirthei khalh thin turin hriattir an ni.