No.2004/2021-2022
Aizawl, 26th August, 2021 : Vawiin chhun khan India Formosa Foundation leh Tzu Chi Foundation, Taiwan tangkawp ten Mizoram sawrkarin COVID-19 hripui leng a dona kawnga a hman turin PPE Kit 10000, N-95 Mask 10000 leh Face Shield 10000 Health Minister Pu R. Lalthangliana hnenah an hlan a, India Formosa Foundation Chairman Pu Jonathan Lalremruata’n heng hmanruate hi Minister hnenah hian a hlan a ni.

Aizawl West YMA Joint YMA Multipurpose Hall, Vaivakawna inhlanna buatsaihah Health Minister Dr. R. Lalthangliana chuan India Formosa Foundation leh Tzu Chi Foundation, Taiwan te chungah lawmthu sawiin kan mamawh hun lai taka tanpuina kan dawng thin hi a lawmawm takzet a, Pathianin min ngaihtuah a ni tih a lang thin a ni, a ti a. India Formosa Foundation chu Mizoram tana COVID-19 dona kawnga tanpuina thehchhuak tam berte zinga mi an ni tih sawiin, Mizoram tan COVID-19 dona atana mamawh chi hrang hrang PPE Kit, Mask, Oxygen Concentrator, Ventilator leh hmanraw dang engemawzat an ngaihtuah tawh bakah COVID-19 hrileng vanga harsatna tawk chhungkua sing tel tanpuina an pe tawh a, ram hrang hrang dawra hetianga hma an la thin hi a lawmawmin a chhuanawm takzet a ni, a ti a. PPE kit leh hmanraw dang tuna an dawn pawh hi a sum faia chhut chuan cheng vaibelchhe khat man a tling hiala a hriat thu sawiin, thawktute tan thil lawmawm tak a ni a, PPE kit te hi a man a to deuh bakah lei tur duh ang anga hmuh zung zung a har tawh avangin renchem tak leh dim taka hmang turin fronline worker PPE kit hmang thintute a chah nghal a, hripui leng laka Mizoram mipuite kan him theihnana tangkai taka kan hman turin Zoram mipuite aiawhin lawm takin ka dawng a ni e, a ti.

Pu Jonathan Lalremruata, India-Formosa Foundation Chairman chuan COVID-19 hripui leng vanga harsatna tawk chhungkua 20000 Mizoram district hrang hrang 8-a mi tanpui turin hma an la mek tih sawiin chhungkua 16000 vel tanpuina hi pek an nih tawh thu leh chhungkaw 4000 vel pe leh tura an inruahman mek thu a sawi a, Bitcoin Foundation, USA kaltlangin oxygen concentrator leh ventilator thahnem tak an chah mek thu a sawi bawk a ni.