No.2003/2021-2022
Aizawl 26th August 2021: Lok Sabha MP Pu C. Lalrosanga chuan nimin ni 25.8.21 khan Kolasib-ah District Infrastructure Scheme Advisory (DISHA) meeting - District Development Monitoring & Coordination Committee Meeting a neihpui a, Kolasib District huamchhunga hmasawnna hna department hrang hrangten an thawh tawh leh thawh mekte an thlir ho a ni. Meeting zawh hian ramri lam panin Vairengte-ah a kal a, vawiin ni 26.8.21 khan Assam nena inkahna hmun leh Saihapui V te a tlawh nghal.

MP Pu C.Lalrosanga chuan Assam nena inkah lai khan New Delhi-ah Parliament Session neia a awm lai a ni a, Session zawh veleh rawn chhoin, vawiin Assam nena inkah atanga thla khat tlinna ni chiahah inkahna hmun a rawn tlawh thei chu lawmawm a tih thu a sawi. Ramri hi muanawm taka chinfel thuai a tul thu leh amah ngei pawhin ramri chungchang hi sorkar laipuiah pawh a lo thlen ve tawh thin leh hemi kawnga sorkar hmalak meknate a lawmawmin, hei aia chak zawk pawhin hma a la zel ang tih a rin thu a sawi bawk. Ramri venhimna kawnga a bul hnai mipuite inpekna hi theihnghilh a ni tawh ngai lo ang a, ramri depa awm Vairengte leh khaw hranga cheng mipuite an fakawmin, ram chhan nana an inpekna, huaisenna leh an tha thawh dan zawng zawngte a ropuiin a entawntlak takzet a ni a ti. Ramria Police duty-te pawh an fakawmin an chhuanawm hle a, ram tana an inpekna a ropui hle a ni a ti bawk.

Pu C. Lalrosanga hian CRPF duty-na hmun leh Saihapui V-a Mizoram Police duty-na hmunte a tlawh nghal bawk a. A tul anga an hman atan Vairengte Joint VC te hnenah Rs.10000/- leh Vairengte-a Police duty-te tan Rs.10000/- , Saihapui V Police duty-te tan Rs.4000/- leh Police te duty camp-a hman atan Silpouline 5 a pe a ni.