Vawiin chawhnu dar 4:00 PM khan khualzin (passenger) phur rel lian, Broad Gauge railway 'Bairabi-Silchar Passenger Train' chu a vawikhatna atan Bairabi Rel Station atangin vai liam a ni a. Mizoram chu India Board Gauge Railway map ah a chuangkai ve ta a ni.

He rel hi Shillong atangin remote hmangin Prime Minister Pu Narendra Modi'an a vai liam a. Bairabi Rel Station atangin Forest & Environment Minister Pu Lalrinmawia Ralte, Parliamentary Secretary Lt. Col. (Rtd.) ZS Zuala leh Kolasib Assembly bialtu Pu PC. Zoram Sangliana; Transport Department Consultant Pu Hrangtawna leh Northeast Frontier Railway senior officer ten rel hi an vai liam bawk a ni.

Bairabi-Silchar Passenger Train service tanna puala inkhawm Bairabi Rel Station-a buatsaihah Pu Lalrinmawia Ralte chuan thu sawiin khualzin phur rel lian service tanna ni hi Mizoram tan chuan ni lawmawm tak a ni a. Rel hi Bairabi mipui leh Mizoram mipuiin kan dawnsawn thiam a ngai a, hmasawnna sang zawkah min hlankai thei a, khawvel tukverhah zau zawkin kan dakchhuah thei dawn ta a ni, a ti.

Lt. Col. (Rtd.) ZS Zuala chuan he ni hi Mizoram tan chuan ni chhinchhiahtlak tak a ni a, khualzin leh bungraw phur rel lian chi in Mizoram an rawn lut hi rahbi thar kan kaina tur a ni, a ti a. He rel hian Mizoram, mipui leh Mizoram economy tan hmasawnna tam zawk a rawn ken luh theih a beisei thu a sawi a ni. Railways chuan an hun tiam chhung ngeiin Sairangah rel a thlen a beisei thu a sawi bawk.

Pu PC. Zoram Sangliana chuan rel lian chi in Mizoram a rawn lut hi malsawmna nia a hriat thusawiin Mizo mipui tan eizawnna lama ke penchhuahna kawng remchangah hmang tangkai thiam turin mipuite a chah a. Bairabi chu Mizoram kawtchhuah pawimawh tak anih dawn tak avangin kawng engkimah Mizo nun zemawi leh Kristian nun dan tha te lantir thin turin mipuite a chah bawk a ni.

Bairabi-Silchar Passenger Train hi nitin service tura ruahman a ni a. Ruahman dan chuan he train hi Bairabi atangin zing dar 5:45 AM ah chhuakin Silchar hi zing dar 9:15 AM ah a thleng ang a. Bairabi panin Silchar chu tlai dar 4:45 PM ah chhuahsanin Bairabi chu zan dar 8:15 ah a thleng ang. He train ah hian passenger phurhna tur bogey 12 a awm dawn a. Bairabi leh Silchar inkarah station 10 ah a ding thin ang.Bairabi-Silchar pana tlan rel number hi 55667 niin Silchar-Bairabi pana tlan rel number chu 55668 a ni thung ang.

Katakhal-Bairabi Broad Railway line hi km. 84 a thui niin kum 1998-99 ah khan sanction a ni a. He metre gauge atanga broad gauge conversion atan hian cheng vaibelchhe 326 ruahman a ni a.Katakhal leh Bairabi inkarah hian lei te nau(minor bridge) 161 leh lian (major bridge) 16 a awm a ni.

Bairabi atanga Sairang thleng tur broad gauge rel line hna hi ngawrh taka thawh mek a ni a. He rel kawng hi km. 51.048 thui tur niin he project atana sum ruahman chu cheng vaibelchhe 2384.34 a ni a. Hmun 23 ah leiverh a rel kawng tur tan tlang(tunnel) a ngai dawn a, tunnel thui ber hi metre 1776 a ni dawn a. He rel kawngah hian lei pawimawh(important bridge) 17; lei lian(major bridge) 20 leh lei tenau(minor bridge) 141 a awm dawn a. Lei sei ber hi metre 1177 a sei a ni dawn a ni. He rel kawng hi March 2019 a peihfel tura ruahman a ni.

May 24 leh 25 khan Railways Safety Commissioner Pu SK Pathak hovin Silchar-Bairabi inkar kawnga passenger phur rel lian a tlan theih leh theih loh tur endik a ni a, nimin khan speed trial te neih niin mithiamte chu he kawngah hian tlan a, a him tawk leh him tawk loh an enfiah a. An zirchianna atangin rel tlan chak zawng tur an bithliah nghal a ni.

Rel hi Bairabi atangin km. 84-a thui Katakhal Junction-ah a kal ang a, Katakhal atangin km. 28 vela thui Silchar ah hian a kal leh dawn a ni.

March ni 21, 2016 khan a hmasa ber atan rel lianin buhfai wagon 40 phurin Bairabi a thleng tawh a ni.