National Service Scheme (NSS) State Level Advisory Committee meeting vawi 13-na chu Chairman Pu Zodintluanga, Sports & Youth Services Minister hovin a pisa-ah vawiin chawhnu dar 1 khan neih a ni.

Meeting kaihruaitu Sports Minister Pu Zodintluanga chuan NSS hma laknaa thil tangkai tak tak siam a ni thin chu a lawmawmin, NSS officer-te leh volunteer-te inpekna a fakawm hle a ni, a ti.

Meeting-ah hian kum kal ta 2014-15 leh 2015-16 chhunga NSS hnathawh chi hrang hrang thlir let a ni a, 2016-17 chhunga an hma chhawp te, an sum mamawh leh special project kalpui tur te, thingphun beihpui thlak tur chungchang leh thil pawimawh dangte sawi ho a ni.

Kum 2014-2015 chhung khan NSS volunteer mipa 13973, hmeichhia 9727, an vaiin 23700 an awm a. Kum 2015-2016 chhung khan NSS volunteer mipa 12180, hmeichhia 11520, an vaiin 23700 an awm thung. Mizoram hmun hrang hranga College 25-ah NSS Unit 87 awmin, Higher Secondary School 51-ah NSS Unit 150 a awm a. NSS unit hrang hrangte hian zun in, vantlang tui semna hmun, chawlhbuk, vantlang inthiarna leh vantlang mamawh thil dang eng emaw zat an siam bakah, thing phun hna, vantlang hmun tihfai hna, thisen pek, zeng hri danna pek leh mipui hrilh bengvarna (awareness campaign) vawi eng emaw zat an buatsaih thin bawk.

Vawiin meeting-ah hian Sports & Youth Services Secretary Pu HL Rochungnunga bakah, SYS leh a kaihhnawih department hrang hrang official-te an tel.