3552/2024-2025

December ni 16, 2024 (Thawhtanni) hian Mizoram Information Commission chuan Mizoram RTI Online-a State Public Information Officer (SPIO) la in register lo department hrang hrang 11 (sawm leh pakhat) hotute chu Pu John Neihlaia, Chief Information Commissioner leh Pu Mangjangam Touthang, Information Commissioner hmaa inlan turin a ko a. He hunah hianin Head of Department leh Senior Officer engemaw zat inlanin RTI Online-ah an department SPIO la in register lote in register ngei a tul thu hrilhhriat an ni a, department hotute pawh hian a hma thei ang bera MIC thuchhuak hi zawma hma lak an tum thu an sawi a ni.

Naktuk December ni 17, 2024 (Thawhlehni) hian department 16 (sawm leh paruk) dang hotute MIC-a inlan leh tura hriattir an ni.

Mizoram RTI Online hi July ni 1, 2022 khan hman theih turin hawn a ni a, General Administration Department chuan July ni 22, 2022 khan hriattirna tichhuakin Departmental Appellate Authority (DAA), State Public Information Officer (SPIO) leh State Assistant Public Information Officer (SAPIO) te he portal-a August ni 22, 2022 aia tlai lova in register  turin a lo ti tawh a. August 21, 2024 khan Mizoram Information Commission chuan September ni 15, 2024 ral hmaa in register vek turin thuchhuah a lo siam tawh bawk a. La in register lo hriatchhuah te chu CIC hmaa an inlan tura koh a nih tur thu hriattir an nih angin Mizoram Information Commission chuan hma a la ta a ni.