438/2024-2025

Champhai, the 8th May, 2024: District Information & Public Relations Office leh District inrelbawlna kawnga pawimawhte zirchiang turin Mizoram Information Service (MIS) Officer thar 5 te chuan vawiin chawhnu khan Champhai an thleng a, Project Director, DRDO Champhai Pu Lalrinawma, SP charge la mektu Addl. SP Pu Lalmalsawma Hnamte te hmuin kawmna hun tha tak an hmang a. Hemi hnu hian thuthar thehdarhtute nen I&PR Conference Hall, CHANEM building-ah inhmelhriattirna leh inkawmhona hun an hmang zui a ni.

DRDO Office Champhai tlawhnaah Pu Lalrinawma, PD, DRDO Champhai chuan DRDO kalphungte tarlangin thingtlang hmasawn nana rural development scheme hrang hrang MGNREGA, PMAY-Gramin leh PMKSY kalpui dante a sawifiah a. Hemi hnu hian MIS Officer-te hian SP Office an tlawh a, SP charge la mektu Addl. SP Pu Lalmalsawma Hnamte in Champhai District Police hmalakna leh security kaihhnawih pawimawhte a lo hrilhfiah a ni.

Hemi hnu hian tlai dar 4:30 ah Champhai District chhunga thuthar thehdarhtute nen inhmelhriattirna leh inkawmhona hun I&PR Conference Hall-ah an nei bawk.

Thuthar thehdarhtute nena inkawmhona hun kaihruaitu Dr. Lallawmkima, DIPRO Champhai chuan kaihruaiin I&PR Department leh MJA Champhai District te'n sawrkar thuchhuah, mipui hriattur puanzar kawngah thawhhona tha tak an neih dante a tarlang a. Pu R. Lalfakawma, Secretary, MJA Champhai District-in inlawmna thu sawiin, MIS Officer tharte aiawhin Pi Biaknungi, IPRO in thu a sawi bakah thuthar thehdarhtute aiawhin MJA Champhai District President Pu Lalhlupuia'n thu a sawi bawk a. Inhmelhriattirna leh inkawmhona hun hlawkthlak tak hman a nih hnuah Pu Francis Lalfakzuala, LDC, DIPRO Office-in lawmthu sawiin hun hman a khar a, zanriah kilho nghal a ni.

Mizoram Information Service 2024 batch mi 5, Pu F. Lalrinfela, IPRO, Pi F. Zodingpuii, IPRO, Pi Biaknungi, IPRO, Pu Lalzara, IPRO leh Pu N. Vahneichhi, IPRO te chuan District Office Orientation Programme nei mekin May ni 8-10, 2024 chhung hian Champhai District-ah training an nei dawn a. Kar hmasa lam kan Kolasib District-ah hun a n hmang a, ruahman dan chuan tun thla tawp hian Lunglei Dstrict an tlawh dawn a ni.