Mizoram Science Centre leh National Council for Science & Technology Communication tangkawpin an buatsaih, ‘Mizoram Inter College Astronomy Quiz Contest 2012’ chu vawiin khan Mizoram Science Centre Auditorium-ah neih a ni.
He Astronomy Quiz Contest-ah hian Mizorama Science zirna awm college 6 atangin college pathum – Pachhunga University College, Govt. Serchhip College leh Govt. Zirtiri Residential Science College te chu telin, heng college pathum zirlai te hi an inel a. Chawhnu lamah Black Hole chungchangah Dr. Arup Kumar, Physics Department Head Govt. Zirtiri Residential Science College chuan lecture a pe a, lawmman semna inkhawm neih chhunzawm nghal a ni. Pu Aldrin Malsawmtluanga, Scientific Officer, Mizoram Science Centre kaihhruai lawmman semna inkhawm tawite ah Dr. R. K. Lallianthanga, Principal Scientific Officer leh Project Director, Mizoram Remote Sensing Application Centre ni bawk chu khuallian niin zirlai te chu an zirlai zir zawh hnua an rilrua cham bet nghet tur chuan a tiha tih a pawimawh a ni tiin hetiang quiz hian an zirlaiah nasa taka a puih ngei a rin thu a sawi a ni.
He Astronomy Quiz-ah hian Govt. Serchhip College team (K. Lallawmzuala leh Vanlalpeka) chu pakhatna niin Certificate, trophy leh pawisa fai Rs. 5000/- an dawng a, pahnihna Govt. Zirtiri Residential Science College team (Lalbiakzama leh B. Lalrintluanga) niin Pachhunga Univeristy College team (Lalramliana Khiangte leh M.Z. Ramthlengliana) chu pathumna an ni.
