Vawiin 21st November 2012, chawhma dar 11:00 hian 33rd State Level Science and Environment Exhibition for Children 2012-1013 chu Government Mamit High School, Mamit ah neih a ni a. Exhibition hi Pi Sangthanmawii, Joint Director, SCERT in khuallian niin a hmanpui a ni.

Exhibition hawnna inkhawm hi Chhim Veng YMA Hall, Mamit ah neih a ni a. Khuallian Pi Sangthanmawii chuan thu sawiin Mamit a Exhibition nghah a nih chhan chu hmun hla zawk a mi te leh thingtlang kilkhawr zawkah te pawh Science thiam leh tui tak tak te an awm a. Chung ang mite thiamna phochhuah sak theihna remchang tak a ni ang tih kan beisei a. Khawvel thang zelah Science hian hmun pawimawh tak a luah chho mek zel a, a luah thuk deuh deuh dawn a ni tiin, thiamna kan neih ringawt duh tawk lovin kan thiamna hman tangkai dan kan hriat a ngai a ni a ti. Tunlai thiamna hmanga tui kan mamawh ang te kan neih theih nan thing phun uar te, ramngaw leh nungcha humhalh a tul thu te sawiin chhiat rupna lo thleng thei leimin leh lirnghing lakah te kan him theih nan a chhan leh a vang hriat a inven nana hmalak dan tur leh inenkawl dan tur te science lama kan hriatna hmang hian hmuhchhuah kan tum tur a ni a ti a, a aia tha zawng chhuak zel tur pawhin ‘Science chu a tih a tih’ a nih angin tan kan la zel tur a ni, a ti.

Hawnna inkhawm hi Pu Micky Lalenkawla, SDEO, Mamit in a kaihruai a, inlawmna thu Pu Lalnunthara, Dy. DPC (RMSA) Mamit in a sawi a. Brief Report Pu R.S. Chauhan, Deputy Director, SCERT (SPW) in a pe a. Zaithiam zai leh lam hmuhnawm tak Government Mamit High School atangin ngaihthlaka thlirho niin Pu P.C. Lalrintluanga, Science Consultant, SCERT in lawmthu sawina a nei bawk a ni.

He exhibition ah hian Mizoram hmun hrang hrang atangin High School 13 leh Higher Secondary School 3 an tel a ni.