Mizorama inthlanpui a awm dawn apiangin mipuite an phurin, political party ten puipunkhawmna te an huaihawt a, zaithiam ten mipui an awi hlim bawk thin tiin The Times of India chuan ni 14 Nov 2008 chhuakah a tarlang a. Amaherawhchu, kohran lam atanga political party te viltu leh endiktu tur ‘Mizoram People’s Forum’ (MPF) lo piang hian election hun chhunga sum hman dan turah bituk a rawn siamte, in tina campaign loh te, ruai buatsaih loh te, puitlin theih loh tur thutiam neihte an rawn khap tak avang leh Election Commission in phalna lova passengers motor a party flag leh chhinchhiahna tarte a khap avangin heng phurna tam tak hi tun tumah chuan a awm lo ani a ti a. Tunhmaa election boruak phur awm tak awm thin ang kha hmuh tur a awm tawh loh avangte in boruak a dai a; election hunlai ani tih pawh hriat hleih theih lovin a awm ani a ti a. Hetiang khapna leh thu zawm tur tam tak siam anih avang hian tun hma a motor hire a party flag, chhinchhiahna leh aurinna nen phur taka campaign thin kha tun tumah erawh a awm tak loh avangin, passenger motor neitu ten sum an lakluhna tur aawm ta lo te; zaithiam leh mi chawkhlim thiam te tan sum hnar a in khar tak thute a tarlang a. Mi tam takin MPF hmalakna hi tha an tih rualin inthlan boruak erawh a daih em avanga hreawm an tih thute TOI hian a ziak bawk ani.
NDTV.COM atanga ni 20th Nov 2008 a Kishalay Bhattacharjeea’n ‘Mizoram inthlanpui ngaihnawm dawn’ tih thupui hmanga a ziah chu tlemte han tarlan tum ila. Inthlan ni atan ni tlemte chauh ala awm tiin Aizawl chu ka rawn chuang lut a. Mak tak mai chu, inthlanpui hmachhawn si inthlan boruak reng ka hmu lo – party flag te ,banner te leh banga intar hmuh tur a awm lova; motor inchei chheichhuai pakhatmah ka tawk bawk lo. India Hmarchhak inthlanpui tehna ah pawh a boruak hi a hniam hle ani. Inthlan boruak hriatthiam a awlai lova, party te inbeih dan zuk luhchilha zuk hrechiang turin chutiang lamhawi lah a awm bawk silo. Ka tih theih awm chhun chu a mimala biak ani mai a, chu lah Mizo tawnga biak an duh zawk thin avangin harsatna ka tawk leh zel si a. Chuvangin, kawng min kawhhmuhtu, ka driver te chu thian rinawm takah ka hmang chho ta ani.
Mizote hunpuia tih makmawh thin chu ‘Ruai’ hi ani a.Amaheawhchu, mitin chhia leh tha hriatna vengtu (conscience keeper), MPF, thupek - electiona sum chelek loh – tih chuan ‘ruai’ hi ka tem dawn lo ani tih min hriattir a. Sorkar piah lama ‘sorkarna dang’ awptu , Kohran chu Mizorama ka kalkawng tawp anih avangin ka pan ta chawt a. Kohran upa te chu mi chhiar zau tak, mi invawng leh tunlai tak mi niin ka hre hlawm a. In hawng takin ka zawhna khirh leh chhan nuam lo tur tak tak te chu hrehna awm miah lovin min chhang vek ani.Mizoramah chuan Kohran hian hmun pawimawh a chang ani tih hi pawm vang nge, ka zawhna lo chhuahna te chu an hre vek a – Mizoram chu sakhuana leh politics hi in dipdal lovin a kal dun zel ani.
Mahse, han chhuah vaha mipuite han belhchian chuan Kohran hi a hnathawhna kawngah a piangsual mek ani tih hi ani a. Zu khap burna thupek an chhuahte hian tunlaiah chuan a lo dawngsawngtu hi an tlem hle tawh a, a mimal ang phei chuan Kohran hian a tih tur chin bak a bawhpelh ani an ti ani. Ka hotel thlenna room ka’n lut chu hreawm ka ti hle. Khum phah chu a fai mahse a room hi a daamin, a rimchhia a.’Suite’ chu an ti ve, a balcony atanga Aizawl khawpui a thlir theih vang ringawtin ! ‘Hospitality industry hian bul ala tan lo ani ber. Hotel a vang in, a ken tel tur (facilities) ang te phei chu a awmlo tih theih ani.Mizo nula te incheina a sang hle a, inchei dan tur ve reng emaw tih turin jeans tawt tak an ha deuh vek ani.Manipur emaw Nagaland emaw hmarchhak khawpui dangte ang lo takin, Aizawl chu a ralmuang hle an Hmarchhak hian engmah beisei tur min pe lo tih min zirtir a, beisei loh thil thleng hian mak min tih tir zawk ani. Mahse, Mizoram hi chuan thil min dilchhut tir hle zawng anih hi tiin a ziak ani.
November ni 27, 2008 a chhuakah Agencies chuan ‘Mizoram chu Inthlanpui neih danah kawng kawhhmuhtu’ a ti a. Inthlanpui in a ken tel thin, huau huau leh rik mup mup awm thin kha Mizorama inthlanpui lo awm turah hian chutiang hmuh tur emaw hriat tur emaw a awm lova. Party flag hmuh tur a awm zeuh zeuh a, chu pawh chu Indian National Congress tih ani deuh vek hlawm.Inthlan kaihhnawih, official te lah, candidate te laina hnai an nih hlawm deuh vek avangin hmun tur an tlem em em mai a. Thian angte leh chhungkhat ang te in mahni chhungte puibawm turin an dinna tur bial lamah an kal fur tawh hlawm a. Chief Minister Office a official pakhat chuan, ‘CM chu inthlan zawhah alo kir chauh ang’ tiin, engkim maiah election lam hawi deuh vek ani tawh a.
Mizoramah hian voters nuai li vel awrh an awm a. Chung zingah chuan hmeichhia nuai 3.08 leh mipa nuai 2.90 an awm a. Amaherawhchu, hmeichhe voters hi mipa aiin tam zawk mahse, seat awm zawng zawng 40 chu tura candidate zawng zawng 206 zingah 9 chauh an awm ani. Congress chuan seat awm zawng zawng 40 an chuh dawn a, MNF in 39, Union Minister Ram Vilas Paswana pawl, Lok Janata Party (LJP) in 39, UDA in 38 leh Independent 36 an ni a.Tun tum hi independent candidate tam ber tum a la ani. Hel in inthlan an tih buai loh nana sorkarin venhimna a dil belh chu Election Commission in a hnawl a. Burma ram nena kan inrina hi Assam Rifles in an venga, Bangladesh nene kan inrina chu Border Security Force ten an veng thung ani.
In tina campaign hian pawisa a mi thlem a awl avangin, phal ani lova. Chu aiah chuan candidate te chu hmun khatah inkhawmna buatsaih sakin, thusawina hun pek theuh an ni a, ngaithlatu lam atangin zawhna te siam ani bawk tiin cable TV ah debate te neih tir an ni bawk tih a ziak bawk ani.
Inthlanna dangdai tiin The Indian Express, ni 24 Nov 2008 chhuakah thupuia hmangin, Kohran thupek hi Election Commissionin zawm tur a tih aiin a khirk zawk a ti a. Tha taka zawm a ni a ti.
Presbyterian Kohran hian Mizo te nun thui takin a nghawng mai ni lovin, inthlanah pawh nasa takin nghawng a nei a ni.Tlawmngai pawl zawng zawng inchhunkhawmna Mizoram People’s Forum kaltlangin, Kohran chuan partyte leh candidate tin te chu zawm tur leh tih loh tur thuchhuah a siam bakah, a vil hna leh a hman thlengin a enkawl a ni a ti a. MPF President, Rev H.Vanlalauva chuan ‘ Thuchhuah kan siam te hi Election Commission ina tih tur leh tih loh tur a tihte tichak tu atana tih a ni a. Mitinin inthlan ralmuang tak leh felfai taka neih kan duh vek a ni’, a ti a. Mak ang reng tak chu, party leh candidate ten MPF thuchhuah hi hnawksaka la lovin an pawm thlap thei mai hi a ni. ‘ MPF thuchhuah hi a tha a, a chhan pakhat chu sum kan sen tlem phah hi a ni,’ Zosangliana,MNF secretary ( publicity) chuan a ti ti a ziakin, K. Aithanga, MNF campaign manager chuan MPF thuchhuah hi inthlanna a tharum thawhna laka vengtu anih theih nan ram pum tan hmahruai tu anih ngei a rin thu a sawi bawk a ni tiin The Indian Express hian a ziak a ni.
‘Congress vote u la,Mizoram sorkar hlemhle tak hi hrem rawh u,’ Prime Minister chuan a ti tih The Indian Express, ni 26 Nov 2008 chhuakah tarlan a ni a. Prime Minister Manmohan Singh chuan Mizorama MNF sorkar, eiruk leh hlemhletna a khat hi December ni 2 ah mipui ten hrem ngei turin a ti, tiin a chhuah a.
MNF sorkar hnuaiah hian eirukna leh hlemhletna namenlo a awm a. Miretheite tana NREGS leh loan ngaihdamna atana sum dahte a chingpen nasa hle a. Tribalte hamthatna tura funds te pawh awmze nei lova hmanral mai mai a ni a. Project hrang hrang kalpui nana central sorkar atanga sum pekte pawh diklo taka hman a ni bawk a. Hrem hi a hun tawh a ni, PM chuan AR Groundah a sawi tiin The Indian Express a ziak a.
Mizorama a zin hmasak ber tumah hian Manmohan Singh chuan Mautam do let nana central atanga sum tam tak pekte chu MNF sorkar hian diklo takin a hmang nasa a; hemi atana cheng vaibelchhe 125 kan rawn pekte kha engtinge a awm zawh tak tiin mipuite chu a zawt a. In puhmawhna thuhlaah Congress chu a tel ve ngailova, thudik chu in hmuh theihin a awm reng hi, a ti.
Prime Minister chuan Congress chu sorkar tir tura nipuite sawmin, ‘ thil thar a awm theih nan in vote kha hmang u la, sorkar laipui a Congress kaihhruai sorkarna leh Mizorama Congress sorkar nen kan programme te hi kan tihlawhtling ngei ang, PM chuan a ti tiin The Indian Express chuan a tarlang a ni.
Prime Minister in Mizram a rawn tlawh chungchang hi The Telegraph, ni 26 Nov 2008 chhuakah ziahlan bawk a ni.
‘Campaign in kawng thar a sial,’ The Telegraph ni 28 Nov 2008 chhuak ah chuan a ti a.
MPF thuchhuah avangin candidate te chuan high – tech an hmang lo thei ta lo a ni.In tina kal khap anih avangin sms hmangin candidate te chuan a mimal angin thu an thawn mai a. Sma in thawn hi MPF hian a lo khap lo hlauh bawk nen. Candidate tin te awm dan en zui reng anih a vangin sms thawn hi a remchan mai bakah a tlawm bawk si a, a mimal ang te a voters te kan kawm theih dan a ni ve mai tiin ,candidate pakhatin a sawi niin he chanchinbu hian a ziak a. Sms inthawn hi mipuite kawm nana technology hman lar anih bakah, Zoram Nationalist Party chuan mipui ten anmahni chiang taka an hriat theihna turin thla hnih kalta atang khan website an hang nghe nghe a ni a ti a.Heng bakah hian ‘live’ in candidate ten TV ah thusawina hun siam sak an ni a,hmun thenkhatah phei chuan screen lian tak dahin mipui ten studio a awm candidate te chu zawhna te zawtin an in be pawp thin a ni tiin The Telegraph chuan a ziak a ni.
Mizoramah Campaign nana mobile phone hman chungchang hi The Financial World (Chandigarh ),ni 13 Nov 2008 chhuakah ziah lan a ni bawk.
Mizoram inthlan campaignah hmeichhia ten an tih theihte an pholang, Times of India, ni 1 Dec 2008 chhuak chuan a ti.
Mizoram inthlanna neih tura Mizo hmeichhe candidate te chu Hillary Clinton emaw Sarah Palin te ang nilo mahse, mipa candidate ten an namnul thei mai bik dawn lo a ni tih an pholang a. Heng mipa zingah hian Chief Minister Zoramthanga ngei pawh telin UDA candidate Lalhmingthangi Hmar, kum 32 chauha upa chuan Champhai South ah hmeichhia ten an tih theihte a rawn phochhuak mek a ni. Hmeichhe candidate te hi an vaiin 9 an awm a. Chung zinga party lian 3 te atanga hmeichhe candidate rawn thehchhuah te hi beiseiawm tih theih vek an ni a. Campaign tirh lam khan ngaihsak an hlawh vak lova,mahse inthlan dawn hnaih tak takah chuan ngaihven an hlawh hle tawh a ni, a bikin hmeichhiate zingah.
Congress party chuan Zothankimi chu Aizawl West constituency a ding turin an rawn vawrh chhuak a. A campaign buaipuitu in an boruak a that chhoh zel avangin an hlim hle thu a sawi nghe nghe a ni. Mizoram ah hian hmeichhia officer lian tak tak an kat nuk a,sumdawnna lamah pawh an duailo hle a ni a ti a. Amaherawhchu, politics ah chuan an dingchhuak mawh hle a ni tiin a tarlang a.Eizawnna hnathawk 100 zelah 45 chu hmeichhia ni a chhut a ni a. He tihlai hian politician 100 zelah hmeichhia 3 chauh awm anga chhut a ni thung.
Kum 1984 khan, tuna Aizawl West constituency a candidate , Zothankimi rawn dinna bialah hian, K.Thansiami chu P.C. ticket in thlan tlin a lo ni tawh a. Hemi tum hian politician hlun Dr.C. Silvera, Union Health Minister ni chho ta kha a hneh nghe nghe a ni.Kum 1987 khan Lalhlimpuii chu thlan tlin a lo ni tawh bawk a,Pu Laldenga Ministry-ah khan Minister of State a ni nghe nghe bawk. Tum tumah hian Hrangturzo constituency ah MNF ticket in a ding a ni tiin Times of India chuan a tarlang a ni.
Hmeichhe candidate chungchang hi The Telegraph, ni 28 Nov 2008 chhuakah pawh ziah lan a niin thlur bik deuh neiin Congress candidate Zothankimi chanchin a ziak a ni.
Rahula’n Congress campaign-na a tih mawi belhchhah tiin The Telegraph North East, ni 22.Nov 2008 chhuak ah a tarlang a. Mizorama vote neite chu a thlawnin ram pek tiam an ni a, sorkarna an chan chuan loneitu/ kuthnathawktu chhungkaw tinte chu cheng nuai khat tiam an ni bawk tiin, thuhmahruaiah a ziak a ni.
Congress chuan sorkarna siam thei ngei turin beihpui an thlak a. Hei hi Rahul Gandhi in election rally hmun thuma a neiha Mizoram tana tih ngei ngei tur a tiam hian a rawn tichiang viau a.Rahula thusawi langsar zual te zingah chuan kawng tinrenga hmasawnna siam te a ni a. Hmasawnna hna thawh, hluihlawn lailawkte tihnun thar thar. Chung ziangah chuan Greater Aizawl Water Supply leh Tuirial Hydel Project te a tel a ni.
Rahula chuan Congress in sorkarna a chan phawt chuan loneitu chhungtin hnenah a thlawna ram pek leh eizawnna tluantling an neih theih nan a bul tan nan cheng nuai khat theuh pek an nih tur thu a sawi a. Hriselna lam leh zirna lamah nasa zawkin hmalak a ni ang a ti bawk. Rahula’n Serchhip, Saitual leh Aizawl-a a thusawina hmunah mipui an kal tha hle a, an party manifesto pawh chiang leh fiah taka a sawi hian ‘Rahula magic’ in hnehna an chan ngei an beisei thu party mi te chuan an sawiin, MNF sorkar nin tawhna avang pawha an sorkar ngei a ring a ni tiin The Telegraph North East hian a ziak bawk a ni.
