Directorate of Industries, Govt. of Mizoram hnen atanga thu dawn danin EPIP hmun, Lengte-a Mizoram ISPAT Industries ten Steel re-rolling plant an siam tur chungchanga thil awmdan dik tak chu a hnuai ami ang hi a ni :
Mizoram ISPAT Industries te hian Mizoram sorkar hnenah Mizoram chhungah Steel Rerolling plant din phalna leh a dinna tur atan hmun remchang an rawn dil a. An dilna hi Mizoram Public Investment Board in ngun taka a ngaihtuah hnu ah Mizoram tana thil tha tur ngei ni a a hriat avangin a remti a. A tul anga hma la zui tur leh Industrial area chhunga an mamawh ang plot ngaihtuah sak turin Industries Department chu tih a ni.
Mizoram Public Investment Board ah hian Chief Secretary chu Chairman a ni a, Department hrang hrang Secretary te member an ni a, Principal Adviser, Mizoram State Planning Board chu Member Secretary a ni.
Mizoram ISPAT Industries ten a Industries an din tur hian Iron rod leh thir chi hrang hrang kum khatah 30000 mt siam chhuak thei tur a ni a. He project siamna atana an sum sen tur hi Rs. 30 crore vel bawr ni tura ngaih a ni a. Hnathawktu (direct employment) mi 300 aia tam leh a behbawma a hlawkna tel tur (indirect employment) mi 3000 aia tam awm tura ngaih a ni. Hetianga investment lian tham Mizoram chhunga rawn siam duh an awm hi Mizoram sorkar chuan tha a tiin Mizoram tan hmasawnna thui tak leh mi tam tak tana eizawnna siam theitu tur niin a ngai zawk a ni.
An Industry dinna tur ram hawhtir chungchangah hian sorkar chu a fimkhur hle a. An factory building leh building dang an mamawh ang te an sak dan tur ruangam (layout plan) pawh Mizoram Investment Board hian uluk takin a thlir hmasa a. Chutianga an mamawh tur ang chin ram chu hawhtir a ni a, an hawh man hi dan in a phut angin allotment fee leh annual rent pawh an pe tawh a ni.
EPIP leh Industrial area dang reng rengah hian allotment fee leh annual rent a ram zau zawng mila pek tur anih avangin Industry din tur te tana a hautak lutuk loh nan an Industry din tur mil tawk a zau plot pek thin an ni a. Tuna EPIP hmuna midang hnena plot allot te hi Mizoram ISPAT Industries te anga Industry lian tham din tur an awm loh avangin plot zim zawk pek man an ni a. Hei hian midang tan plot zau zawk a pek ve theih loh tihna a ni lo.
Ram in hawhtir chungchangah loan dah kham atana hman theih ang leh Industries Director-chu an loan lakna a Guarantor-a tang tur anga sawi hi thil hriatsual leh thudiklo a ni. Mizoram ISPAT te hian an Industries din nan hian loan lian tham lak an mamawh dawn avangin least hold right an rawn dil a. An dilna hi sorkar in uluk takin a lo thlir a, kan thenawm state Meghalaya te leh hmun danga an tihdan kalphung pawh uluk taka zir chian a nih hnuah least hold right hi pek an ni a. Chumi awmzia chu he Industry hian loan la in rul theilo ta se a loan petu Financial Institution-te hian a ram hawhtu (Lessee) nihna chu an la chhawng thei ang tihna ang deuh a ni a. Hei hian Financial Institution te tan security a siamna mai tur a ni. Hemi bakah hian least hold right an neih hi an hmansual lohna turin leh Mizoram tana himlo tur anga an kalpui tur veng turin an loan dilna reng reng Industries Director-in hriatpuiin hming a sign ve tur a ni tia dah a ni a. Hei hian Industry Director chu Guarantor-ah a tang tihna a nilova, Mizoram sorkar hi Guarantor-ah a tang tihna a ni hek lo. An Industry atana ram hawhtir hi an hmansual lohna tura in venna sorkar in a siam zawk a ni.
EPIP ram hi Mizote tan kum 10 bak hawhtir phalloh ni anga tarlan hi thu diklo a ni.EPIP ram chhungah hian Mizo Industry din thei an awm phawt chuan an mamawh ang chen chen hmantir theih an ni. Amaherawhchu, industrial area hrang hranga plot dil ve si Industry din leh mumal silo, mimal ram anga cheibawl tum ta mai leh Industry tenau te a hming leka din a, in leh lo din nana hman zawk tum leh huan anga cheibawl tum an tam avangin mi engemaw zat hnenah kum 10 chhung atana luah hawh phalna pek phawt an awm a. Heng te hian Industry an din a, a nihna tur anga ram hi hmang anih phawt chuan extend leh zel theih tur an nih pawh hriattir an ni. Hetih lai hian pawn lam atanga sum tam tak senga Industry rawn din duh te hian ngaihngam taka Industry an din theihna turin hun rei zawk chhung hawh phalna an mamawh a. An mamawh ang hian pek mai a ni. Hetiang taka investment ti ve tur Mizo an awm anih chuan least period rei zawk pek theih a ni.
Mizoram ISPAT Industry te hi an investment a len tham avangin dan dinglai angin Mizoram chhunga registration pek mai theih anih loh avangin company registration ti tura hrilh an ni a. Hei hi hma la nghalin tunah hian an tifel tawh ni a hriat a ni a, an registration document -hi Mizoram sorkar ah an rawn thehlut leh dawn a ni.
Hetiang hi thil awmdan anih avangin Mizoram sorkar in Mizoram ISPAT Industries te Industry dinna atana phalna a pek leh a dinna tur ram allotment a siam chungchangah hian dan bawhchhiatna leh Mizoram tana himlo tur thil a awm in a lang lo. He Industry din anih hnu a Mizoram in hlawkna a neih tur te : a) Mi tam takin eizawnna an hmuh phah ang ; b) An Iron Rod siamchhuah tur ISI quality tling ngei siam an tum avang leh Mizoram chhunga siamchhuah anih chuan a man a tlawm zawk dawn a. Rod quality tha man tlawm zawkin Mizoramin a hmuh phah thei dawn a ni ; c) Mizoram chhunga thirchhia tam tak hi raw material atana an hman tel dawn avangin thirchhe hralhna (market) mumal zawk Mizoramah a awm phah dawn a ni ; d) Mizoram ISPAT Industries - te hian an hnuaia thawk tur hian Mizote a tam thei ang ber training pe in rawih an inhuam a, hei hian Mizo thalai te tan inhlawhfak na remchang a hawng dawn a ni.
