Ni 8 leh Ni 10. March, 2018-a Mizo Zirlai Pawl ten Zophai, Bairabi-a 'Zofate Chawlhbuk' sak an tum hriatchian tuma kal Mizoram Journalist te chunga Assam Police ten kut an thlak leh hliam an tawrh tir avanga lungawiloh lantirnan khian Mizoram Journalist Association, Kolasib District huaihawtin Kolasib Bawrhsap pisa tual-ah 'Sit-in demonstration' neih a ni.
Lungawiloh lantirna hun hi Kolasib District MJA Vice President Andrew VL Auva chuan a kaihruai a, MJA President R. Lalhmingthanga chuan thusawiin, "Assam Police ten Zophai-ah min vua a, min hlap a, Press mi kan ni tih leh kan Press Card phawrhin awmzia a nei lova, hmeichhiate himna ngai pawimawha Women Commission hial kan neihna India ramah hian Assam Police te lakah kan Mizo Hmeichhe Journalist te pawh an him chuanglo. Kan taksa na ai mahin kan rilru a na a, sawi tur kan hrelo a ni" tiin a sawi.
MJA President chuan khawvel-a Democracy ram lian ber tia inchhal India ramah Media te chu Democracy lungphum pali-na tia sawi thin ni mahse Assam Police te chuan ramri lung Piller pakhat tlukah pawh Mizoram Media te chu an ngailo niin a sawi a, Democracy lungphum pali-na chu vuak thiah tumin Assam Police ten an beih thu sawiin, "India danpui Article-19 Right to freedom of speech & expression an bawhchhia a, keini Mizo Journalist te chuan, 'Bullets can kill, Words will survive' tiin Democracy hi kan humhim zel dawn a ni" tiin a sawi bawk.
Assam Police ten hliam an tawrh tir zing ami H. Vanlalnghaka, Ex-President, MJA Kolasib District pawhin he hunah hian thusawiin, Assam Police te chuan Mizo Journalist te chu Press Card an lek lawp lawp chung pawhin an taksa rem lai laiah an vua tih a sawi a, an taksa hliam ai mahin an rilru natna avangin zan mu pawh an tuah theih loh thu a sawi.
Journalist kalkhawmte chuan Resolution pass in Assam sorkar Police ten ni 8 leh ni 10 March, 2018-a pawisawilo Mizoram Journalist te hliam an tawrh tir chu na an tih thu leh hliam tuarte chu Assam sorkar in zangnadawmna pe ngei turin an phut thu leh Assam Police ten Mizoram Journalist te kut an thlak chungchang hi Press Council of India leh Prime Minister Office-ah thlen ni rawh se tihte an pass a ni.
