Nimin a Bairabi buaina chungchanga Chief Minister Pu Lal Thanhawla'n Central Sawrkar hnena lehkha a thawn chu  Union Home Minister Pu Rajnath Singh chuan vawiin khan a rawn chhang.

Union Home Minister Pu Rajnath Singh chuan Bairabi a buaina chungchangah Mizoram leh Assam sawrkar te chuan an theihtawp chhuahin remna leh muanna a awm leh  thuai theih nan hma la se. Thukhatvua, inpawh taka inrawn tlang tur leh thawk tlang chungin state pahnih inkara inhriatthiamlohna chu chinfel ni se tih chu Central Sawrkar ngaihdan a ni tih a tarlang.

Union Minister Pu Rajnath Singh chuan Union Home Secretary  pawh  karleh chhungin Mizoram Chief Secretary leh Assam Chief Secretary inbiakna  hun buatsaihsak turin a hriattir tawh tih a tarlang a. Mizoram sawrkarin a lo thlen thin leh ngen thin tawh  angin tun tumah hian Chief Secretary te inbiak zawh hnuah,  Mizoram leh Assam Chief Minister te inbiakna neih pawh Central Sawrkar chuan a phalsak ta bawk a ni. Pu Rajnath Singh  chuan Bairabi leh a chhehvel ramri hrulah buaina siam a nih loh nan state sawrkar pawh hma la turin a ngen a ni.