4241/2025-2026

Dated Serchhip, the 30th January, 2026 : Vawiin khan MJA Serchhip District Annual Conference vawi 26-na chu Serchhip Press Club ah hman a ni a, I&PR Deputy Director Pu Andrew H. Lalremruata chuan khuallian niin he hun hi a hmanpui a. DRDO Project Director Dr. Malsawmtluanga Fanchun chuan khualzahawm niin a hman pui bawk a ni.

Khuallian Pu Andrew H. Lalremruata chuan Serchhip District MJA Annual Conference vawi -26-na khuallian ni a a hmanpui thei chu lawmawm a tih thu a sawi a. Tunlai khawvelah print media hi a tlahniam chho deuhin lang mahse chanchinbu chu a ral mai dawn loh thu sawiin, tunlai technology thang chho zel karah tan la zel turin Serchhipa chanchinbu mite a fuih a. Tunlai mipui bengvar tawh takah hian MJA Member te chuan Journalist Ethics hre reng tur leh an zahawmna vawng tlat tura fuihin Serchhip District MJA te an kal zelna turah duhsakna a hlan bawk.

He huna khualzahawm DRDO Serchhip Project Director Dr. Malsawmtluanga Fanchun pawhin thusawiin, Democracy ramah chuan Journalist ten mawhphurhna thuk tak an neih thute, thudik hrula information diklo avangin mipuiten ngaihdan diklo an put theih thu te, IT hmasawnna avangin Media ah thil inthlakthleng tam tak a awm tawh avangin a tul anga inher rem thiam ve zel tura MJA Member te fuihin, an pawimawhna leh mawhphurhna hre reng a, an zahawmna vawng nung thiam reng turin a chah bawk.

MJA Serchhip District Annual Conference hi Serchhip District MJA Vice-President Pu Kapliana Pachuau in a kaihruai a, Secretary Pu T Biakchamliana'n kum kalta chhunga MJA Serchhip District chetvelna hrang hrang report a pe a. Serchhip District MJA President Pu C. Lalhminghlua'n thu a sawi bakah MJA Gen Hqrs atangin General Secretary Pu K. Zothanpara'n thu an sawi bawk.

Tun dinhmunah Serchhip District ah MJA Member 14 an awm mek a ni.