4240/2025-2026

Dated Serchhip, the 30th January, 2026 : Vawiin khan Minister of State, Rural Development & Administration Department changtu Prof. Lalnilawma chuan Mizoram State Rural Livelihoods Mission (MzSRLM) hnuaia din Ropuiliani Women Farmer Producer Company Limited member (shareholders) te tharchhuah Mizo Hmarchate Metric Ton 5 MIFCO Complex, Chhingchhip atangin a vailiam.

Prof. Lalnilawma chuan Ropuiliani Women Farmer Producer Company-te hmalakna chu fakawm a tih thu a sawi a. Mizo hmarcha bik hi ram pawnah kan thawn chhuak tawh thin a, Mizo hmarcha a nihna a lang tawh thin lova chuvang chuan Mizoram atanga thawnchhuah a ni tih lantir zel anih tawh thu sawiin Mizo hminga a kal tawh thu a sawi a ni. Kan thlai tharte kan thawnchhuah dawn chuan a grading kan uluk a tul a, chuti a nih loh chuan belhchian kan dawl lo anga, rei kan daih dawn lo a ni, a ti. Vawiina Mizo hmarcha thawhchhuahna hun hman hian hian rah tha chhuah se a duh thu sawiin, kalkhawmte chu tei rei peih tur leh vawi khata hlawk thut tumna rilru pu lo turin a chah bawk. Thlai thar hralhna chungchangah harsatna neuh neuh a awm thin chu MzSRLM leh sawrkat atanga te leh company atangte pawhin theihtawp an chhuah zel tur thu a sawi bawk a ni.

Ropuiliani Women Farmer Producer Company Limited hi Mizoram State Rural Livelihoods Mission (MzSRLM), Rural Development & Administration Department hnuaia sub-scheme pakhat Mahila Kisan Sashaktikaran Pariyojana (MKSP) Value Chain project kaltlanga din niin. He Company kaltlang hian MzSRLM hnuaia Self Help Group member hmeichhiate chu shareholders a ziahluh an ni, Producer Company kaltlang hian Sawhthing, Mizo Hmarcha leh Aieng hralhna mumal zawk an neih theih nan hmalakna kalpui mek a ni a. He hmalakna kaltlang hian Mizoram chhunga District 7 (Champhai, Khawzawl, Saitual, Aizawl, Serchhip, Mamit, Kolasib District) leh R.D Block 16 (Champhai, Khawbung, Khawzawl, Ngopa, Phullen, Aibawk, Thingsulthliah, Darlawn, Serchhip, East Lungdar, Reiek, West Phaileng, Zawlnuam, Thingdawl, Bilkhawthlir leh Kawrtethawveng RD Block) tuamchhuah vek niin, Board of Directors mi 5 leh first subscribers mi 12 an awm mek bawk. He project huamchhunga khaw 154 chuang atangin shareholders mi 6346 an inziak lut tawh a, he Company enkawl tur hian staff mi 9 awm mekin, Technical Support Agency hi Foundation for Development of Rural Value Chains (FDRVC) te an ni.

Huam zau zawk leh chak zawka he company a kal chhoh zel theih nan member in ziah luh runpui January leh February, 2026 thla chhung awh turin MzSRLM leh company staff ten beihpui an thlak chho mek a, he member mobilization drive zawh a nih hnuah company chuan February, 2026 chhungin a member (shareholders) te hnen atangin sawhthing leh aieng leisak leh turin ruahmanna a siam mek.

Kum 2025-2026 (December 2025 leh January 2026) chhungin he company hian a member District 4, R.D Block 5 leh khaw 35 atangin Mizo hmarchate 15.2 MT leisak tawhin vawiin thleng hian heng a leisak zinga 5 MT chu Sus Agri Development Pvt. Ltd., Bengaluru hnenah hralh chhuah niin. Hei bakah hian 7.5 MT hi Relentless Foods Pvt. Ltd., Odisha hnena hralh mai theih turin company warehouse, MIFCO Complex, Chhingchhip-ah hian khawih danglam theihloha (sealed) dah that a ni bawk.

He hun hi MzSRLM Chief Executive Officer Pi Zosangzuali chuan a kaihruai a. MIFCO Chairman Pu Lalthazuala Royte, DRDO Project Director Dr. Malsawmtluanga Fanchun, Sr. EE PHED Serchhip Pu Isaac Lalchhuanmawia te MzSRLM hotute, Ropuiliani Women Farmer Producer Company Limited Staff leh shareholders ten an telpui bawk a ni.